India-a space agency chuan hlawhtling takin vanthengrenga thil awm, black hole leh a dangte zirtu tur (observatory) keng rocket a kap chhuak.

Thawhtanni zing dar 9:10-ah khan Sriharikota spaceport atangin a kap chhuak a ni.

India-in a kah chhuah hi khualrel thil danglam tak, black hole zirtu tur kah chhuah pahnihna niin kum 2021 khan Nasa-in a lo kap chhuak tawh a ni.

Space agency chuan an thil kah chhuah hian scientistten ‘black hole an hriat dan’ a puih ngei a beisei tih an sawi.

“Hmabak phurawm tak kan nei dawn a ni,” tiin Indian Space Research Organisation (Isro) chairperson S Somanath chuan an kah chhuah hnuah a sawi.

Black hole an tih hi vanthengrenga hmun ruak pakhat, thil hip khawmtu a ni a. A thil hipna a chak em avangin engmah dawl zo a awm lo va, êng thlengin a hip vek thei a ni.

Black hole-te hi arsi lian tak puak darh ta atanga insiam nia ngaih a ni a, thenkhat chu an liam em em a, ni aia a let tluklehdingawn tela lian pawh an awm.

Isro-in thlalem a kah chhuah tak, X-ray Polarimeter Satellite (XPoSat) hmang hian thuk zawkin black hole hi a zir chiang dawn a ni.

A siamna man hi Rs. Maktaduai 25 vel a ni a, XPoSat hi kum nga dam tura duan a ni.

Isro hian nikum khan hlawhtlinna ropui tak a lo chang tawh a. August khan Chandrayaan-3 an tih hmangin thla chhim tawp lamah tumin tumah la tih theih loh a ti a. Reilo te hnuah ni zir chiangtu tur a tirh hmasak ber, Aditya-L1 a kap chhuak leh bawk.

Kuminah pawh hmachhawp lian tak tak an nei a, Thawhtannia XPoSat an kah chhuah pawh hi heng zinga pakhat a ni.

“Kum 2024 hi Gaganyaan inpeih kum tur a ni,” tiin Somnath chuan a sawi a, hei hi vansang lawn mi (astronaut) pathum khawvel hel tura kah chhuaha ni thum hnua leia lak let leh tumna a ni.

Isro hian enchhin thawh khatna chu hlawhtling takin October, 2023 khan a lo kalpui tawh a, kum 2025-ah a taka mihring kah chhuah ngei an tum a, chumin atan chuan kumin hi inbuatsaiha inpeih kumah hman a tum a ni.