Covid-19 leng avanga harsatna an tawh laiin Thansanga & Sons Auto Division chuan Yamaha R15 thar leh Ray ZR 125 thar an tlangzarh a, thalaite duh zawng a nih avangin hma an sawnpui ngei an beisei.

Tlangzarhna hun hi an showroom, Ramhlun North-ah sawm bik mi tlemte hmaah Mizorama Yamaha motorcycle dealer VIP Robert Lalremruata leh Info Bikes hotupa Vanlalmuana'n ten an khuhhawng a ni.

Mizorama motorcycle hralh chhuah tawh zingah thalaiten R15 an lawm zual hle a, version 4.0 lei tuma hauh lawk leh ngaihven mi 200 vel an awm.

Info Bikes hotupa Muantea chuan, "2008 khan India ramah R15 tihchuah a ni a, ngainatu a ngahin thalaite duhthusam bike, motorcycle huanga danglamna thlentu a ni," a ti.

Nalh leh changkang tak a nih bakah tha lehzual leh filawr takin version 4.0 an siam chhuak tih sawiin, "Ama class-pui bike dangin a la neih ngai loh khawl tha leh changkang bika duan a ni a.

"Version 4.0 hrang hrangah hian rider-te himna tur traction control dah vek a ni. Quick shifter dah tel a ni bawk a, V4 model zawng zawnga awm vek lo mah se a sang hovah an dah a, darkar khata km 20-a chaka a tlan chinah clutch hmang lovin a chho zawngin gear lian ber atanga a tawp thlengin a thlak nghal vek theih a ni," a ti.

Ray ZR thar that bikna sawi bawkin, "Engine tha hybrid a hman avangin a hma aiin 13% velin fuat a nei zawk a, petrol a heh lo zawk dawn bawk," tiin kawng hrang hrangah rider tana awlsamna leh thil tha zawk an bilh tel bawk a ni.

Thansanga and Sons Auto Division enkawltu Robert-a chuan mi dang ang bawkin hri lengin an sumdawnna a nghawng a, R15 V4 leh Ray ZR Hybrid-in ngaihven a hlawh avangin ziaawm lam an pan theih a ring.

"Nikum atangin a buaithlak a, kuminah May atanga inkharkhip a nih bakah thla hmasa chhung pawhin dawr hawn theih hun ni kua chiah kan nei. Mizo thalaite duh leh ngaihven hlawh tak lirthei thar hralh chhuah tur kan neih avangin kan ziaawm phah erawh kan ring a, pangngai taka thil kalpui leh mai erawh a la harsa rih ang," a ti.

Mizo thalai hnathawk 50 vel an chhawr a, nikum chho atangin thla tina hlawh pangngai pek ziah theih a harsat thu a sawi bawk.

Thansanga and Sons Auto Division hi 2019-2020 chhunga Mizoram sorkar hnuaia chhiah GST pe hnem sumdawng 15 zingah an tel a ni.

YAMAHA R-15 V4 MODEL HRANG HRANG MAN (Mizoram on-road price) :
R-15 V4 M MotoGP Edition : Rs 2,01,917
R-15 V4 M Metallic Grey : Rs 1,99,838
R-15 V4 Racing Blue : Rs 1,94,635
R-15 V4 Darknight : Rs 1,90,474
R-15 V4 Metallic Red : Rs 1,89,434