February 15, 2024: Diakkawn Branch YMA bultumin nimin khan an veng aṭanga chin hriat loh a bo Vanbawihliana @Bawiha (16) s/o Ngunmeni chu khawtlang huapa zawn a ni a, chanchin buatsaih lai thleng hian hmuh ala ni lo.

Kolasib Aw in a tarlan danin, Vanbawihliana hi Cichai Khua, Tahan (Myanmar) piah a awm niin amah hi rualban lo a ni a, Mizo ṭawng thiam luluk lo a ni. Yangoon fahran run-a seilian a ni a, nikum November thla khan an chhungte belin Kolasib-ah rawn hruaithlak a ni. Diakkawn Silchar Road-ah Lalngilneii te inah awmin thla hlui January 31 zan dar 8:30 vel khan an chenna aṭang hian a chhuak a, heta ṭang hian hmuh zui a ni ta lo.

Diakkawn YMA te hi kawngpui dung hrang hrang - Aizawl leh Silchar lam bakah Bairabi leh Phaisen lamah bo zawng hian an in ṭhendarh a, hmun ualau lai leh remchang apiangah a thlalak tar a nih bakah Silchar lam YMA te hriattir niin ramri lama duty police te pawh an hriattir a, media hrang hrangah thehdarh a ni bawk. Thawhlehni khan South Chhimluang kawngah amah ang tak hmuh ni awma report awm chu finfiah tuma hmalak zui a ni a, chanchin buatsaih lai thleng hian mi bo hi hmuh ala ni lo.