February 14, 2023; Thang chi hrang hrang hmanga sava leh nungcha dang tam tak tihlum tu leh an chet dan Youtube channel a upload thin mi pahnih man an ni.

EF&CC department tarlan danin, an mi man te hi Joseph Hmangaihzauva (27) s/o Zoramliana, South Vanlaiphai (Sikul Veng) Hnahthial district leh Lalmuansanga (32) s/o Hranghleithanga, Phunchawng, Aizawl district te an ni a, heng mite hi Wildlife (Protection) Act, 1972 hnuaiah pawisa chawi tira hrem an ni. An Youtube channel a an thangkam dan leh nungcha chi hrang hrang an tihhlumna video pawh nawhreh (delete) tir an ni.

Joseph Hmangaihzauva hian a Youtube channel 'Puiloa Zinkawng' ah a ramsa thang kam a en lai leh nungcha chi hrang hrang a awk lai a ti lang thin a, amah hi chhui mai a harsat avangin Cyber Crime Division, Aizawl te puihna in chhui chhuah a ni a, an chhungkaw dinhmun te en in Rs. 4,000 chawitir a ni.

Lalmuansanga hian a Youtube channel 'Sangtea mifel em em' ah a ramsa thang kam a en lai leh nungcha chi hrang hrang a awk lai a ti lang thin a, ani pawh an chhungkaw dinhmun te enin Rs. 4,000 chawitir a ni bawk.

Anni bakah hian Youtuber thenkhat ten ramsa leh sava an pel lai leh thang chi hrang hrang hmanga sava leh nungcha dang an ti hlum lai video an upload thin te chu chhui mek zel a ni bawk.