Aizawl August 12, 2022 : YMA Pangzawl Ramrikawn Branch chuan thuchhuah siamin, an khaw tlangval HS Lalhruaitluanga, kum 33, tukin zing dar 5:30 rik hma deuh khan Pangzawl Ramrikawn Baptist Kohhran Biak In chhungah thi a hmuh thu-ah fimkhur turin an khaw mipuite an chah, an khua te chu an khaw tlangval thih dan chungchangah Youtubers te lo ngaipawimawh lo turin ngenna an siam.

YMA Pangzawl Ramrikawn Branch chuan, "Hruaitea thih dan chungchangah, khawi khawi atangin emaw youtuber content bengverh zawng neih tuma chanchin rawn zawt an awm a nih pawhin lo ngaihpawimawh sak loh ni se, tiin khawtlang mipui te kan inngen e," tiin an thuchhuah-ah hian an tarlang. "Hruaitea hi mi kut tuara thi a nih a rinawm lo a, hei hi investigation rawn titu police te leh mipui nawlpui rin dan pawh a ni," an ti bawk.

HS Lalhruaitluanga hi tukin zing dar 5:30 rik hma deuh khan Pangzawl Ramrikawn Baptist Kohhran Biak In chhungah thi a hmuh a ni.

Hruaitea hi Pangzawl leh Thiltlang inkara leiminin truck a hnawl hma zan, August 2, 2022 khan truck tâng buaipuiin a kal a. Hetah hian chesualin a lu a sawh a. Serious tak angin lang lo mah se, hemi hnu hian lu na leh luakin harsatna a nei chho a. Pangzawl PHC ah admit a ni.

August 12, 2022, zing dar 1:30 rik hma deuh khan a thiante In pakhat-ah kalin an mu a kaitho a, "Ka inkhawm dawn a, in hair gel ka lo hmang teh ang," tiin a dil nghe nghe. Pangzawl Ramrikawn atanga thulakna chuan, "Hetia a khawsak dan atang pawh hian harsatna a nei a, a taksa lamah fel lo a awm a ni tih a hriat theih mai awm e," tiin ZALEN a hrilh.

Thudawnna chuan, "Heta tang hian a thlang lawka Baptist Kohhran Biak Inah lutin a luh dan leh Biak In chhunga a awm zui dan erawh chiang taka hriat theih a ni lo va, zing tawngtai inkhawma kal te'n an hmuh pawh hian a taksa hi a la khawng lo a, a bula thisen tlem awm pawh a la khal lo a ni," a ti.

Hnahthial atangin police-in investigation tiin a hmunah an thleng nghal a, postmortem a nih hnu ah a nakruh 5 tliakin chu chuan a chuap a khawih tel tih hriat chhuah a ni. Post mortem report leh chhuina hrang hrang atangin Biak In gallery (Biak In pawn lam atanga luh chhoh theih) ah lut chhovin, gallery atang hian Biak In chhung tla thlain, thutthleng sir zum laiah a nak a zuk sawh a, hetiang vanduaina hi a tawk ta nia ngaih a ni.

Pangzawl atanga thudawnna chuan Hruaitea hi hi tlangval fel leh taima tak a nih thu a sawi a, tuna a chetsualna Biak In Kohhran Hall sak mekah pawh regular taka inhlawh thin a nih thu a sawi bawk.