ZALEN November 13, 2024 : YMA Central Coordination Committee (CCC) vawiina thukhawm chuan, November ni 7, 2024 zana mi tutih hriatloh ten Jiribam District, Manipur-a Zairawn khua a In 17 an hal leh he khua a Hermon Dew English Junior High School-a zirtirtu hnathawk lai, Zosangkim Hmar, Ngurthansang-a nupui rawng taka Silaia kah hlum a ni leh ni 11.11.2024 (Thawhtanni)-a Central Reserve Police Force (CRPF) ten pawisawi lo mi 10 rawng taka an that leh hliam 1 a awm chu pawi an ti.

CCC Meeting chuan thi chhungte an tuarpui tak zet tih an tarlang a, a hnuai a mi ang hian Resolution an siam.

Kan unau pawisawi lo Zosangkim Hmar leh mi 10 CRPF ten an that leh mi 1 an hliam hi kan dem tak zet a. He thil thlenga mawhphurtute hi a rang thei ang bera chhuichhuah an nih theih nan leh an phu ang ngeia hrem an nih theih nan Central sawrkar-in hma la nghal rawh se.

Nunna chan mi 11 leh hliam tuar mi 1 chhungte hi zangnadawmna Central Sawrkar-in pe ngei rawh se.

Manipur tualchhung buaina hi a rang thei ang berin Central Sawrkar-in ching fel rawh se.