DOWNLOAD OUR APP

Read latest news on your phone
app-store
Zimbabwe khawpui, Harare-ah tuihri vangin emergency puang
Nov 17, 2023

Zimbabwe khawpui, Harare-ah tuihri a len nasat avangin emergency puan a ni.


Hri leng avang hian mi thahnem tak an thi tawh a, a vei nia hriat mi 7,000 chuang an awm tawh bawk.


Khawpui thuneitute chuan hri leng hian khawpui pum a tuam a, kum 2008-a mi sang chuang an thihna nen khan a inang tan niin an sawi.


“Tuihri avang hian emergency puan a ni,” tiin Mayor Ian Makone chuan tual chhung chanchinbu hnenah a sawi.


Thuneitute hian a darh zel loh nan hma lain tui him tha an sem bawk a, puihna dawng erawh an la tlem hle tih an sawi.


Damdawi in thuneitute chuan damdawi ina dah luh an tam lutuk avangin an buai hle tih International Federation of the Red Cross (IFRC) chuan a sawi.


Thawktu an tlem bakah a darh zel tur venna tur hmanrua an indaih tawk lo hle.


Zimbabwe hian tun hnaiah pawh tuihri leng chiam hi an lo tawng tawh a, hei hi tui thianghlim an tlakchham vang a ni.


Tun tuma leng hi Harare daia mihring bitna lai, Kuwadzana atanga intan a ni a, a vei zahve pawh heng laia mi hi niin thuneituten an sawi.


Kawthalo chi khat, tuihri hi tui leh ei tur thianghlim lo, bacterium Vibrio cholerae awmna in leh ei vanga awm a ni.


Oral rehydration solution pein ek leh luaka taksaa al leh tuihnang chhuak nasa lutuk luah khat turin pek thin an ni.


Ningani khan Harare mayor chuan tuihri leng mek hi kum 2008-a an tawn ang kha a ni tih a sawi.


Kum 2008-ah khan mi 4,000 chuang thiin mi 1,00,000 velin an vei a, damdawi in pawh tuihri bak buaipui thei lovin an awm a ni.


He thil thleng avang hian hetih hun laia president, Robert Mugabe chuan hun rei tak a lo elpui tawh, Morgan Tsvangirai chu thuneihna insem turin a rem phah.


Kum 2018 khan khawsikpui leh tuihri avanga mi 20 thia mi 2,000 chuang vei an awm hnuah emergency puan a lo ni tawh bawk.


“Tuihri hi phuba la ang maiin a lo thawk leh a ni,” tiin Ningani khan mayor chuan a sawi.


Thawhlehni khan health ministry chuan a vei rinhlelh 7,398 awmin mi 50 an thi a, mi 109 damdawi inah an awm mek bawk.


Health minister pawhin a len tanna hmun hi a tlawh tawh a, tihrehna atan hma lak niin khawlaia thil zuarte senghawi an ni a, truck-in tui thianghlim an sem bawk.


IFRC chuan hri hi a darh chak hle a, district 62 awma 45 lut tawhin province 10 an neihah pawh a vei an awm vek tawh tih a sawi.


An ramri pawh a pel thei reng niin an sawi bawk.


An ram thenawm - Malawi, South Africa leh Mozambique te hian tun hmain tuihri leng hi an lo tawng tawh thin.

Euro 2024 final opinion poll
Euro 2024-ah hian tunge champion I rin?
Spain
England

Latest News & Chhiar Hlawh