ZALEN May 15, 2025 : National Institude of Electronic and Information Technology (NIELIT) Director General Dr. MM Tripathi chuan vawiin khan NIELIT, Aizawl Seminar Hall-ah course thar pathum a hawng.

Course hawn thar pathum te hi M. Tech (Artificial Intelligence & Machine Learning), B. Tech (Artificial Intelligence & Machine Learning) leh B. Tech in Electronics (Internet of Things) a ni a. Nikum lama Deemed University a hlan kai NIELIT hian Course awm mek Diploma, BCA, MCA leh non formal course hrang hrang an nei sa a ni. He hmuna zirna course fee hi Schedule Tribe leh Schedule Caste tan sawrkar laipuiin a tum sak vek a ni. Mizoram sawrkarin a la thei tan Scho a la pe bawk.

NIELIT Aizawl a zirte course thenkhat, non formal course leh short term course te hi Mizoram sawrkar Education Department hnuai a ni a, Master of Science (Electronics) hi Mizoram University course niin a bak zawng chu NIELIT Deemed University course a ni thung a ni.

Course thar hawngtu NIELIT Director General Dr. MM Tripathi chuan, "Vawiina course hawn thar te chu hna tamna course a ni a, thalai te thuam chaktu tur course a nih mai bakah ram ei leh bar hmasawnna kawngah pawh pui thei tur thiamna pe theitu pawimawh tak a ni. NEILIT in an tum ber chu thiamna bik nei, state tana tha thawh theih tur chherchhuah a ni," a ti. An university chhuak te hna hmuh kawngah an buai loh thu a sawi.

Dr. Tripathi chuan an university chu Industry lian hrang hrang nen an inzawm thu leh an zirlai pawh industry lian te nena inrawna duan, hna thiamna tura mihring chherchhuahna hmun a nih thu a sawi a. Digital Platform tih hmasawn kawnga nasa taka hma an lak mek thu sawiin, he hmalakna avang hian zin veihvahna tur senso hautak pumpelhna a nih bakah khawvel mithiam hrang hrangten zirtir hna awlsam taka an rawn thawhna tur a nih thu a sawi a ni.