September 5, 2023; Chief minister Zoramthanga'n zirtirtute chu ram leh hnam rohlu, lehkha zir thiamna bakah, mihring puitling chherchhuahna hna thawktu ropui tak an ni a ti.

A official IG page a a tarlan danin, Zirtirtute Ni hi Dr. Sarvepalli Radhakrishnan, India ram President pahnihna, zirtirtu ropui tak hriatreng nan a piancham September ni 5, 1888 hi 'Zirtirtute Ni' atan hman a ni a. Kum 1962 atangin India ram pumpuiah urhsun taka hman thin a ni.

"Vawiin Zirtirtute Ni vawi 61-naah hian Zirtirtu hna thawk mekte leh chawl tawh zawng zawngte zahna chibak ka buk che u," tiin, zirtirtute hi ram leh hnam rohlu, lehkha zir thiamna bakah mihring puitling chherchhuahna hna thawktu ropui tak an ni a, an pawimawhna leh hlutna te, an mawhphurhna sang tak hi ram mipuiten kan hriatsak reng a pawimawh niin a tarlang.

"Khawvela mi ropui leh mithiamte hi zirtirtute kut chhuak an ni a, zirtirtu hna chu hna zahawm chungchuang (Noble Profession) an lo ti hial thin. Zirtirtu hna chu hna zahawm chungchuang tak a lo nih zel theih nan Zirtirtute pawhin mawhphurhna an nei a, zirlaite leh ram mipuite pawhin hna zahawm thawktute zah leh chawimawi hi kan tih tur a ni tih i hre thar leh ang u," tiin a tarlang bawk.

Kuminah hian National Award to Teachers 2023 dawng tur, India rama zirtirtu tha thlan chhuah 50 zinga tel phak, Govt. Diakkawn High School, Kolasib ah Zirtirtu thawk lai Lalthianghlima chu a lawmpui hle tih tarlang bawkin, he National Award hi India ram khawpui New Delhi-ah India President-in vawiin Zirtirtute Ni-ah hian a hlan ang.