Aizawl February 13, 2024: Vawiin khan Chief Minister Lalduhoma chuan CM Conference Hall-ah Chanchinthar thehdarhtu te a kawm a, ZMC atana hma an lakna hrang hrang te a sawi a, hemi atana an duh ang Doctor an hmu thei lo chu harsatna pakhat a nih thu a sawi.

Chief Minister chuan ZMC mamawh Doctor tur nasa takin an zawng tih a sawi a, advertisement te pawh vawi engemaw zat chhuah a nih tawh thu a sawi a, mahse, chhangtu an awm ngai loh avangin Medical College atana Doctor mamawh zat Indian Medical Council-in tehna an neih chu an tlin loh phah thinna chhan pakhat niin a sawi.

Tun hnaia Delhi a zin khan ZMC-in an hman nghal mai tur Vaibelchhe 1.2 a hmuh sak tih a sawi. Union Minister of Health & Family Welfare, Dr. Mansukh Mandaviya a hmuh naah ZMC chungchang a sawipui a, hemi atana sum an mamawh tur an lo zuk dil tawh Crore 300 hmanna tur project an siam-ah mamawh rih loh engemaw zat a awm avangin, siamthat a nih thu a sawi a, Inthlan puan hma ngeiin 1st installment pek hman an tum nia an hriat thu a sawi.