Aizawl September 15, 2023: Vawiin khan I&PR Minister Lalruatkima chuan Zoram Medical College (ZMC) College Week kharna leh Cultural Day ‘ELIXIR 2023', Dawrpui Multipurpose Hall-a neih chu khuallian niin a hmanpui.

Khuallian Lalruatkima chuan ZMC-in Elixir 2023 hmang tura an sawm chu lawmawm tiin, zirna bakah taksa leh rilru hriselna lam hawi program pawimawh an buatsaih chu fakawm a tih thu a sawi a. ZMC puitlin a nih theih nan leh tun dinhmun thleng tura hmalakna te tarlangin, theihtawp chhuahtu leh sulsutute fakawm a tih thu a sawi. Infant Mortality Rate bika India rama State titha ber dinhmun Mizoram-in a hauh chu Health Department, Doctor rual, mithiam leh thawktu dang te thahnemngaihna vang a ni, a ti.

Thusawitu dang ZMC Director Dr. John Zohmingthanga chuan ZMC thuamthat leh tihchangtlun kawnga Sawrkarin theihtawp a chhuah thin chu lawmawm a tih thu a sawi a. College Week 2023 felfai taka zawhfel a nih theih nana theihtawp chhuahtute chhuanawm a tih thu a sawi a. ZMC zirlaite, a bik takin State pawn atanga lokalte lawmna thu sawiin, theihtawp chhuaha lehkha zir zel turin a fuih nghal bawk.

Vawiin hun hmanah hian Lalrinawma, ZMC Evangelical Union President chuan hunserh hmangin K.Lalruatfela, ZMC Students' Union President-in kalkhawmte lawmna thu a sawi a. Dr. Jane R. Ralte, Registrar, ZMC hnen atangin thusawi ngaihthlak a ni bawk.