Aizawl: MNF Lengteng South Block, North Zone chuan political training leh intuaitharna hun Pawlrang Community Hall ah an nei a, he hun hi MNYF President leh Lengteng bialtu MLA ni bawk Dr L.Thangmawia MLA chuan khuallian niin a hmanpui a, MNF leh Chief Minister thiltum ber chu Zofate rorelna pakhat hnuaia awm a ni, a ti.

June ni 2,2023 intuaitharna hmanpuitu Dr L.Thangmawia MLA chuan, Malsawmna dawn hmasak beisei leh hlawkna chauh um lova ram leh hnam, khawtlang dah hmasatu nih tum theuh turin MNF hruaitu kalkhawmte a chah a, rinawm tak leh taima taka thawktute hnenah Pathian malsawmna a rawn thleng mai thin, a ti.

Myanmar, Bangladesh leh Manipur tualchhung buaina avanga Mizoram rawn bel te chungchang sawiin MNYF President Dr. L Thangmawia chuan, "Mizoram sawrkar pawhin a theihna zawng zawngin kan unaute hi a lo kuangkuah a, an tan theihtawp a la chhuahzel dawn a, Zofate rorelna pakhat hnuai a kan awm hi MNF leh Chief Minister Zoramthanga thiltum lian ber a ni. Hemi tihlawhtling tur hian MNF chuan ke a penzel dawn a, hemi kawnga hmalatu pawl leh mimal hrang hrangte hnenah lawmthu ka sawi bawk a ni," a ti.

Dr. L. Thangmawia chuan, "Kum 2020 kumtir atanga Covid-19 hrileng chuan MNF sawrkar term hi kum 2 dawn min pawhtawi sak ang hial a ni a, hemi chhung hian Mizoram sawrkar chuan ram hmasawnna lam aiin mipui dam khawchhuahna chu a ngaihpawimawh hmasak ber a ni. Covid-19 avang khan Mizoram hmasawnna tura kan sum hmuhtur beisei vbc. 3000 dawn chu sawrkar laipui atangin kan dawnglo a, kan beisei loh lamah Mizoram sawrkar chuan vbc 200 chuangzet mipuite dam khawchhuahna turin a seng ta zawk a ni," a ti.

Thangmawia chuan, politics zinkawng ah mahni in ngaih ropuina hian awmzia a nei thuilo viau a, amah hrechiang tute leh bial mipuite hriat chian nih a hlu ber a, a tlo ber bawk a ni, a ti bawk.