Aizawl February 12, 2024 : May10.2.2024 Inrinni khan Ministry of DONER chuan PM- DevINE atangin Aizawl By Pass Road (Sairang - Muallungthu) siamna tur sum Vbc. 500/- chu Mizoram Sawrkar hnenah a rawn sanction fel ta chu MNF chuan lawmawm an ti a. He kawng siamna tura mutmawh hnarmawha neitu Chief Minister hlui Zoramthanga inpekna leh hnathawh lo lang chhuak zel tiin lawmawm an ti.

MNF chuan Chief Minister hlui hian Aizawl khawpui helna tur kawng siam a tul thu Central Sawrkar hnenah a thlen nasa hle a. Sairang atanga Khawchhak lam leh chhim lam panna tur kawnglian siam dan a ruahman a. Chhim lam pan tur kawng hi Sihhmui - Sakawrtuichhun - Tanhril - Tlangnuam - Samtlang leh Lungleng inkarah kalin Muallungthu ramah Aizawl - Thenzawl kawng a pawh ang. He rawtna hi Central lam hotute pawhin pawmpuiin Union Fibance Minister pawhin Zoramthanga hnenah tihhlawhtlin a nih tur thu a lo sawi tawh a, Union Budget-ah vbc 500 hi a lo dah tawh a ni. Mimal ram conmpensation-ah harsatna awm deuh avangin kum kal ta chhung khan sanction hmuh hman a ni ta lova. Tunah hian sanction hmuh a lo ni ta hi lawmawm an ti takzet a ni.

Khawchhak lam panna tur kawng pawh Sairang - Rangvamual ral lehlam - Bawngkawn Brigade field hmar lam atanga Leiverh kaw hnih (twin tunnel) awmin, Zemabawk - Selesih kawng, Muthi thlen hma kawn hnuai chhuah lamah a lo chhuak ang a; Chuta tang chuan Tuirial airfield hmar lama lui kanin Phaibawk bulah kawngpui fin tur a ni. Hemi atan pawh hian leiverh hna hi Tender chhuah fel a ni ta bawk a ni, an ti.

MNF chuan, "Kan Chief Minister kal ta, MNF President Zoramthanga khan vei tak te a veiin, kawngpui tha leh ramro kan neih na turte, Traffic tawt lutuk tihziaawm te kha tihtakzetin hma a la a, hmalakna lian tham a nih avangin vawi lehkhata peih zung zung theih a ni lova, thil chhut chiang lo leh hrechiang lo mipui tam tak leh ramhruaitu thenkhat phei chuan nuihzat ah te an nei a nih kha. A hnathawh rah vawiinah a lo lang chho zel a. Ram tan rohlu tak a nih chhoh zelna turin tuna rorel mekte hian tha tak leh kuttling taka an chhunzawm ngei kan beisei a. An hnathawh pawh a thlithlai reng dawn bawk a ni," an ti.