ZALEN January 5, 2024 : Zo Reunification Organisation (ZORO) chuan thuchhuah siamin India sawrkarin Free Movement Regime (FMR) tihbo a, India leh Myanmar ramri hung a, Zofate daidanna bang siam a tum mek hi an duh lo takzet tih an tarlang, India sawrkar chu ngaihtuah nawn leh turin an ngen.

ZORO chuan, "He daidanna bang hi siam a nih chuan intlawhpawh turin phalna passport leh visa te a ngai dawn a ni. Hemi avang hian ZORO chuan Zofate inzawmna chhut chah a tum hi ngaihtuah nawn turin India hi kan ngen a ni," an ti.

ZORO chuan, "India hi United Nations Declaration on the Rights of Indigenous Peoples 2007 (UNDRIP) signatory ve ngat a ni a. Article 36-na chu khawvel ramriin a then tualto hnamte chungchang niin, mahni hnampuite leh midang, ramri leh lama awmte nena thlarau nun lam thil te, hnam thil te, politics, economic leh social thilahte thawhho te leh inzawmna te neih a chhawm nun te hi tualto hnamte chanvo ve a nih thu a chuang a ni," an ti bawk.

Free Movement Regime hi a tirah chuan phalna hranpa ngai lo a, kilometre 40 thleng zan riak lo va zin theihna a ni a, a hnuah kilometre 16-ah tih tawi a ni. FMR hnuaiah hian ramri hrula awmte hi zalen takin an intlawhpawh thei a, ram hrana awm an ni tih pawh an inhre lo emaw tih hial tur a ni thin. India-in a tih tawp chuan chhungte tlawh leh mitthi vuinaa tel tur pawhin passport an neih a, visa kan dil zel a ngai dawn ni.