Aizawl July 18, 2023 : ZO Reunification Organisation (ZORO) Meeting chuan July 16, 2023-a North East Live-a Manipur Chief Minister N. Biren Singh-'n Mizoram chhung a ruihhlo kal vel Mizoram Police in an man sak chungchang sawiselna tawngkam a lo nei ve chu tul an tih loh thu an sawi.

ZORO chuan, "Manipur Chief Minister chu Mizoram state chhung thil thleng chungchangah rawn inrawlh buai lo turin kan hriattir a, a in rawlh loh na turah a in rawlh a kan ngai a ni. Manipur Chief Minister hian a state huamchhungah Human Rights dan khawvel hmaah a bawhchhia a, Sawrkar leh Police chakna hmanga Zofate min bei hi kan dem takzet a ni tih kan puang nawn leh a ni," an ti.

Manipur Governor-in Manipur tualchhung buaina thleng chu an state pawn a bikin Burma ram atanga rawn chhuak anga a sawi hi chu an dem thu an sawi a, Manipur tualchhung buaina hi anmahni Manipur state Sawrkar siam a ni tih hre nawn turin an ngen tih ZORO chuan an sawi.

ZORO chuan, MZP in ni 6, May 2023-a thuchhuah a lo siam tawh Manipur tualchhung buai avanga Mizoram chhunga Meitei awmte an sa himna tura pawn chhuak rih lo tura a lo hriattir tawh chu a thlawp tlat a. Mizoram State chhunga Meitei awmte chu anmahni sa him na tur a nih zawk dawn avangin pawn chhuak lo turin a ngen bawk a ni.

Vawiina ZO Reunification Organisation (ZORO) chuan executive committee meeting chuan July 12, 2023-a Manipur tualchhung buaina avanga kan unaute tawrhpuina, thlavang hauhna leh nunna chan te sunna hun hman zawh tak thlirletna leh hmalak zel dan tur sawi a ni. Manipur a unaute thlavang hauhva, tawrhpui leh sunna hun hmanga rawn penchhuak te chungah lawmthu an sawi a ni.