ZALEN November 1, 2024 : Leader of Opposition Lalchhandama Ralte chuan Sinlung Hills Council inthlan lo awm tur campaign-in Tuivawl bial a fang kual mek a, ZPM chet dan chu hmangaihna mak tia a hriat thu leh tun tum inthlanah hian bial 12-ah bial kual tal an lak ngei a beisei thu a sawi.

Lalchhandama Ralte chuan, "Kan sawrkar hrawn mêk hian beiseina sâng tak min neih tir a, mipuite min duat êm êm anga insawi reng siin mipui min sawrfu mek a. Buhfai man sang takin an ti pung a, chhiah hrang hrang an ti sang a, hmangaihna mak tak chu a ni e. Kan ti ang, an tih chu kan ti lo ang tihna, kan ti lo ang an tih chu kan ti ang tihna a ni a, an insawi loh ang zêla awm hi kalphung thar chu a ni ber awm e," a ti. 

"Tuivawl bial mipuite hnenah lawmthu ka sawi duh a. Pathian leh kan ram tân tia thuthlung kan vuana, rinawmna kan vawng nung tlat te, kan workers te leh min duhsak mêktu neutral te pawhin min thlâwp leh ngei dâwn tih a hriat theih mêk avâng hian a thlamuan thlâk hle a. Tuivawl bial chhûng bial rûkah hian bialruk a vai hian kan lâk vek theih ka ring tlat a ni," tiin, "Chalfilh bial lamah bial li-ah bialhnih tal, Serlui bial lamah bial hnihah bial khat tal, a vaiin bial kua tal la tûrin kan inbuatsaih mêk a, tan kan lâk deuh deuh a tûl tak meuh meuh a ni," Chhantea chuan a ti bawk.

MNF Vice President chhuan, "Vanduai thlâk takin Council term kal taah khân Covid-19 avângin kumhnih leh a chanve, an term chanve deuhthaw kha hnathawk hlei thei lovin an awm a, chumi piah lamah Sinlung Hill Council-a kan thawhpui HPC party chhûngah inlungrual lohna, thuneihna inchuhna a awm avângin lalna leh thuneihna inthlâkin, sawrkar tum li tum nga lai inthlâk ngaiin an awm a. Hei hi ka sawi duh, Pathian leh mipui zarah tun inthlanah hian kan sawrkar dâwn a ni tih ka sawi duh a. Council budget kan neih te, development fund kan neih te, engkim mai dik takin kan hmang ang a. Council sawrkar nghet leh mumal tak, hnathawk thei kan din dawn a ni," a ti bawk.

Tuivawl bialtu MLA chuan SHC inthlan lo awm tûrah hian Hmar tlângdung hmangaihtu tak tak, bial chhûng hmangaihtu tak tak hi tu te nge tih ngaihtuah a, vote hlu tak hmanga duhthlanna dik hmang tûrin mipuite a sawm bawk a ni.