ZALEN April 4, 2025 : MNF sawrkara minister hlui K. Vanlalauva chuan ZPM chu ram mipuiin an zia an hre chho mek a, mipui rorelna an hma chhawn dawn a. Lo sawisel chiam chiam hi a tul ber rih lo a ti.

Vawiina MNF Hnam Run, Lunglei-a thu a sawinaah K. Vanlaluva chuan, "ZPM sawrkar hian eng kawngah pawh sawrkar hmasate fak hi an hreh ngawih ngawih a. Eng thil pawh hawng se, sawrkar hmasate thawh leh hmalakna a ni vek chungin an tha hi a na em em a ni. Chutihrual chuan, Session neih zawh tak atang phei kha chuan an worker te hi an zak ngawih ngawih a. An mahni party chhungah an inkhel mek a. Mipuiin ram rorelna an kalpui dan an enin an zia an hre chho mek a. Mipui kutthlakna hi an la tuar ve dawn a. mipui kutthlakna an la hmachhawn ve dawn," a ti

MNF General Hqrs Core Committee Member chuan, "Keini lam hian lo sawisel chiam chiam hi a la hun lutuk lo. Keimahni hi ZPM tlukchhiat hun nghak reng tur kan ni lo. Pathian leh kan ram tan rorelna chelh leh turin Party chhungah inbuatsaihna I kalpui ila, kan lo tihdik tawk lohnaah insiam tha in ram mipuite beisei sawrkar nghelnghet leh innghahna tlak siam turin I inbuatsaih ang u," a ti bawk.