ZALEN April 1, 2025 : ZPM party chuan nimin Financial Year khar ni a Chief Minister Lalduhoma, Finance Minister ni bawk te nupa-in Aizawl Treasury Office pahnih, Aizawl North leh South Treasury te tlawha hun an hmanpui chu lawmawm an ti a, an chhuang hle tih thuchhuah an siamah an tarlang.

ZPM Party chuan, "Department chan ngaihsaktu Chief Minister, Finance Minister ni bawk kan nei hi lawmawm kan tiin kan chhuang hle a ni. Nikum Financial Year tawp ni pawh khan kumin ang tho hian Finance Minister hian Finance Department te hun a lo hman pui tawh bawk a ni," an ti.

ZPM chuan, "Mizoram sum dinhmun tha lo tak pawhin Kalphungthar mipui sawrkarah hma a sawn chho hret hret a, Financial Year thara cheng Vbc 900 chuang kan luhpui thei tur hian hma kan sawn tih a lantir chiang a ni. Nikum lam khan cheng Vbc 500 vel Financial Year hlui atang khan chhuahpui a, kumin FY tharah, nikum lama kan luhpui cheng Vbc 500 aiin cheng Vbc 400 zeta tam kan luhpui thei hian, kan sum dinhmun tha lo viau mah se, Finance Minister Lalduhoma leh TBC Lalvenchhunga, Adviser to CM (Finance & Planning) changtu leh a thawhpuite zarah hmasawnna kan hmu chho ta hi lawmawm kan ti a, a ngaihna hria Finance Minister kan nei hi kan chhuang hle a ni. Kumin sawrkar kum a tawp rual hian, pension charge lut sa zawng zawng pek fel vek hman a ni a, GPF leh MR bill pawh a lut ang ang pek fel vek a ni ta hi opui kan ti takzet a ni," an ti.

Leiba rulh kawngah pawh sawrkarin tan a la nasa hle nia sawiin, "ZPM kan sawrkar tirh, December 2023 leh January 2025 inkarah khan Medical Bill (MR Bill) cheng Vbc 90 zet rulh a lo ni tawh a. K-Deposit a sum tang cheng Vbc 653 zet pekchhuah a ni bawk. Hei mai bakah hian GPF cheng Vbc 782 te, ruang phurh man cheng nuai 23 te December 2023 leh January 2025 inkarah hian pek chhuah a ni tawh bawk a ni.

FY 2019-2020 atanga 2023-2024 chhunga kan eng chhit man (Electric Bill) sawrkarin a bat avang khan cheng Vbc 22 zet kan chawi a. ZPM sawrkar a lo piang a, FY 2024-2025 a lo herchhuah meuh chuan, bill kan pek that avangin cheng nuai 100 lai bill pek that lawman (rebate) kan dawng let thei ta te kha a ropui a, sum enkawl thiam, Finance Minister tha neih leh neih lohin awmzia a neihzia a tarlang chiang hle a ni," an ti.

ZPM chuan, "Finance Minister leh a thawhpuite zarah kan sum dinhmunin hma sawn hret hret mah se, kan sum dinhmun hi a la tha lo hle a ni tih mipui ten hre reng ila, a theih ang anga sawrkar sum hman kawngah inrenchem a tulzia te hrenawn fo turin mipuite kan ngen a ni," an ti bawk.