Aizawl June 26, 2023: Vawiin khan ZPM chuan chhung inkhawm hun an hmang a, he hunah hian ZPM Leader Lalduhoma, MLA chuan an party boruak chhia leh buai tak anga sawi chu a dik lo niin a sawi a, Party dang te chhe lailet der anga an sawina a awm a nih chuan dahchhuak ngam se a duh thu a sawi bawk.

Lalduhoma chuan, "Tunlai hian kan party-in beih kan tawk nasa hle a, kan sawi loh pui sawia inpuhna te, party boruak chhia leh buai tak angin min puangzar a, mahse heng hi a dikna chu hunin a rawn hril dawn a ni," a ti a, “ZPM an inti tha bik, an intithianghlim bik, Kohhran hi kan Unit an ti tih te vawrhdarh a ni a; Party dang sawrkar tawh te engmah thatna nei lo leh chhe lailet dera puh angin min sawi bawk thin a, hetiang hi kan party hian kan sawi ka la hre ngai lo. Party dang engmah thawhchhuah nei lo, chhe lailet der anga kan sawina chu rawn dahchhuak ngam se kan ti," a ti.

ZPM Leader chuan, "Corruption chungchang te, Health Care chungchang leh sawrkar hnathawk hlawh chungchang leh thil dangah kan auchhuak thin. Mimalin kan bei ngai lova, keini erawh mimal takin na tak takin min bei a, tualthat ang hialah te min puh bawk. Keini chuan MNF leh Congress-te hi hun rei tak Mizoram enkawl tura ruat an lo ni tawh a, thil tha tam tak pawh an ti; mahse hunin thil a her liampui thin a, vawiinah chuan ZPM hunpui a lo inherchhuak ve dawn ta niiin a lang a, chutah chuan i fatu tlang ila tiin kan zinga lo tel turin kan insawm mai a ni," a ti.

Lalduhoma chuan, "ZPM chhungkua hi buai hlea min chhuah an tum a, he party din tirh ata theihtawp chhuahin min bei reng a ni. Leader chungchang-ah te, thawhhona chungchang-ah te, Chief Minister chungchangah te buai leh kal hlei thei lo turah te min ngai a, Pu Sapdanga nen kan inkar chungchangte pawh kan sawi zing lutuk tawh. Heng an sawi zawng zawng hi dik se ZPM hian vawiin hi kan thleng lovang, kan pung hek lovang. Mahse kan lian tual tual a, bial tinah hma kan sawnin ZPM-ah an lo lut zut zut reng a ni," a ti.

2018 inthlan dawna an dinhmun leh tuna an dinhmun sawiin, "Kum 2018 tir lamah khan bial tinah a mawngphah kan ni a, kum tawpah kan inthlang a, Pathian zarah bial 8 kan chang a, bial tam takah pahnihna kan ni bawk. Kum 2018-a kan harsatna chu bial vil tur leh ding tur kan harsatna kha a ni a, tunah chuan kan lo lian ta hle a, kum 2018 letling chiahin kan awm ta a, kan luhai dan pawh a dang ta. Mi tha tak tak, party tana rinawm leh taima bial vil tur chang lo tam tak an awm thei ta hi a ropui hle a ni. Party chhungah harsatna lian a awm lova, kan hritlang ve lik lek chauh a, damdawiinah admit ngai erawh an awm lo. He thil avanga party atanga chhuak ta hi mi tlem a zawng Lunglei lamah an awm ve a, chu bak an awm lo," a ti. 

ZPM Leader chuan an party an tan thu sawiin, "ZPM Block leh Unit bakah frontal lamte tunlai hian an tang hle mai a, candidate te sum tihektu ni lova, an mamawh sum paitu zawk nih tumin inhlawhin an phe suau suau mai hi hmuh a nuam a, hei hi kalphung tharin a ken chu a ni. ZPM chuan party dangten sawrkarna an lo siam tawh aia thaa sawrkarna siam kan tum tlat a, kan danglam dawn tih kan sawi a, a bikin Corruption chungchangah fihlim kan tum a, Corruption rim nam Minister leh MLA kan awm a thiang ve dawn lo a ni," a ti bawk.