Aizawl July 18, 2023 : Mizoram Pradesh Youth Congress Committee (MPYCC)-in ZPM Leader Lalduhoma BJP nena Guwahati-a inbiakna nei anga an sawi chungchangah BJP Minority Morcha National Secretary, Delson Notlia chuan Congress party chungah lawmthu a sawi a, Mizoram top leader hruai kawi theia an ngai chu lawmawm a tih thu ZALEN a hrilh a, an zin dun loh tih a sawi.

ZPM Leader Lalduhoma zin chungchanga in puh mawhna awm mek karah a zin pui nia MPYCC-in an sawi BJP National Secretary Delson Notlia chuan Duhoma nen an zin dun loh thu a sawi a, car khatah a chuan chu sawi loh inbiak pawh an inbiak loh thu a sawi a, Guwahati Aiport atangin BMW car senin a thlenna tur hmun a pan tih a sawi.

Delson Notlia chuan National Secretary a nih angin Assam state chu a bial a ni thu leh thla khatah vawi 8 emaw vawi 10 te Assam a tlawh thin tih sawiin, tunhnaia Guwahati a pan ni takah ZPM Leader chu a zin ve avangin party pakhatin an ngaihruatna in zin dunah puh nia a ngaih thu a sawi a, "Kan zin dun anga an sawi hi thu dik lo a ni," a ti.

Delson Notlia, Guwahati Aiport a thlen hian Guwahati khawpuia BJP hruaitute'n an lo hmuah thu a sawi a,"City president in min lo hmuak a, BMW car senin ka thlenna tur kan pan," a ti a. Congress party-in Mizoram top leader hruai kawi thei anga an ngai chu amah an lo ngai ropui hle nia a hriat thu leh nuihzathlak a tih thu a sawi.

Tarlan tawh angin, MPYCC chuan July ni 13,2023 khan thuchhuah siamin ZPM Leader Lalduhoma chu June ni 27-a Guwahati a zin tumin North East Democratic Alliance Convener, Assam CM Himanta Biswa Sarma hmu tura kal a ni tih thawm te awmin, rinhlelhawm an tih thu leh hemi chungchang hi sawi fiah turin an lo phut tawh a ni.

ZPM Leader Duhoma hian nimina ZPM Office-a party chhung inkhawmah Guwahati a zin chhan chu a fate hmu tura kal a nih thu a lo sawi tawh bawk a, BJP Minority Morcha National Secretary Delson Notlia chuan Airport-ah Lalduhoma chu a hmu ngei tih ZALEN a hrilh a, ZPM leader hi hmaichhana tum khat an inbiaktawh bak inbiakna an la neih loh thu a sawi bawk.