Aizawl: Tunkar February ni 15,2024 (Ningani) a Zoram Peoples Movement leh February ni 20,2024 (Thawhlehni) a Mizoram Pradesh Congress Committee hruaitu thlanna loawm tur chu thuang hnihin an chuh dawn nia thudawn a ni.

ZALEN thudawn danin Zoram Peoples Movement hruaitu thlanna hi Baptist Multipurpose Centre, Falkland vengah neih a ni dawn a, Feb.15 hian President, Vice President leh Treasurer te thlan an ni ang a, a tuk Feb.16 ah Executive member tur thlan an ni leh ang.

ZPM hian nomination file lovin kalkhawmte atangin hruaitu tur hi nomination siamin an thlang dawn a, President atan hian hming pahnih lang awmin chung te chu President ni lai Lalliansawta leh Aizawl West III bialtu MLA ni mek VL Zaithanzama te an ni. Vice President leh Treasurer atan hian mi engemaw zat hming lang an awm a, mahse ZPM hruaitu thlan hi floor nomination tur anih avangin President ang chuan ualau taka hming lang erawh mi 4/5 vel chauh an la awm hrih nia thudawn a ni bawk.

Mizoram Pradesh Congress Committee hruaitu thlanna hi February ni 20,2024 hian Lal Thanhawla auditorium-ah neih a ni dawn a. Tunhnaia MPCC thuneitu sang thukhawm chuan official nomination siamin President ah Lal Thanzara, Vice President ah Lalnunmawia Chuango leh Treasurer ah Dr. Lalmalsawma te an vawrhchhuak a. Hetih lai hian ministry kaltaa Congress Lagislature Party hruaitute chuan floor atanga chuh tumin February ni 8,2024 khan hming an pe lut a. Floor atanga chuh tum te hi President ah Zodintluanga, Vice President ah C.Ngunlianchunga leh Treasurer ah Lalrindika Ralte te an ni. MPCC elected OB thlan rual hian party executive tur mi 40 thlan nghal an ni ang.

Eptu party lian ber Mizo National Front hruaitu dinglai term pawh a tawp tak avangin hruaitu thar thlang turin an inbuatsaih mek a. MNF President Zoramthanga chu nomination committee siamin hei hian an party hruaitu tur an zawng dawn nia thudawn a ni.