Aizawl; ZPM legislature party a tel MLA 5 te chuan an MLA fund leh an hlawh atanga Covid dona Chief minister relief fund a an pek thin chu pek chhunzawm an tum tawh lo

ZPM legislature party secretary Dr. Vanlalthlana hnen atanga ZALEN thudawn danin, Covid dona atan an MLA fund 1st installment atangin cheng nuai 25 CM relief fund ah an lo pe tawh a, a bak cheng nuai 25 chu pek chhunzawm an tum tawh lo. "An ti tak tak lo kan ti deuh a, thil dangah pawisa an hmang reng tho a…" Dr. Mathlana chuan a ti.

Dr. Mathlana sawi danin, ZPM legislature party thukhawm thurel angin, an fund leh an hlawh atangin Covid dona an pe tawh dawn lo a, chu chu assembly secretariat lam pawh hriattirin, hlawh cut tawh lo tura tihna an thehlut a, chumi ang chuan an hlawh cut a ni tawh lo. Kum 2020-21 chhung atana an MLA fund 2nd intallment an la dawn loh thu leh dawng pawh nise pek chhunzawm an tum tawh loh thu Dr. Mathlana chuan a sawi.

"Kan pek tello pawhin pawisa an hmang reng a, restricted tender pawh an inpe reng tho a, hna te pawh an thawk reng a, chuvangin kan pawisa hi an mamawhlo ange, kan ti ta a ni," Dr. Mathlana chuan a ti.

MNF, ZPM leh BJP MLA mi 35-te chuan an hlawhpui atangin Covid-19 dona atana CM in 60%, speaker, minister, deputy speaker leh deputy chief whip-te'n 50% leh MLA ten 30% theuh thawh an lo rel tawh a, kum 2020-21 financial year chhung a fund cheng nuai 150 an neihah MNF, ZPM leh BJP MLA-te chuan Rs. 50,00,000 theuh Covid-19 do nan thawh an lo rel tawh bawk.