Aizawl November 17, 2022 : ZPM Leader Lalduhoma chuan Tuivawl constituency a tlawhnaa thu a sawinaah, ZPM policy pui ber chu kuthnathawktute dawmchhuah a ni, tiin ZPM chuan theihtawp an chhuah thu leh mipuite kan ding chhuak ang a, kan intodelh ang tih hi hlau te ne kan inhmachhawn mek a ni, a ti.

Kepran leh Pehlawn khua a tlawhnaa Lalduhoma chuan thu sawiin, "Kan mithiamte nen ngun takin kan zir ho a, research based-in hna kan thawk dawn a ni. Crop zone kan siam ang a, kan ram sik leh sa leh a ram leilung azirin thlai kan ching bawk dawn a ni," a ti. "Kan thalai rual thiamna nei sang tak takte khawvel tukverhah an dak vek tawh a, heng kan thalai rualte tuihalna hi keini chuan kan hrethiam a, anmahnia an din theihna turin kan pui dawn a ni. He kan ram zimte siamthat hi thil huphurhawm tak pawh a ni lo, thil harsa pawh a ni lo, hemi siamtha tur hian keini ZPM chuan theihtawp kan chhuah a, chutih laiin mipuite hi kan ding chhuak ang a, kan intodelh ang tih hi hlau ngawih ngawih an awm a, heng mite nen hian kan inhmachhawn mek a ni," a ti.

Eirukna chungchang sawiin Duhoma chuan, "Kan ram thanmawhbawk leh tun dinhmuna min hruai thlengtu chu eirukna a ni. Tute emaw chu term khat an MLA dek dek a, Minister an ni dek dek a, in lian tak tak an sa a, ram zau pui pui an lei nghal thei mai zel a; heng mite hi an eiru lai hmuh kher a ngai lo, an chet danah a lang vek a ni. Eirukna do chungchangah hian political party chauh ni lovin Kohhran leh NGO te an harh nasa tawh zawk niin a lang ta a, a lawmawm hle a ni. Kan hma lawka Synod Inkhawmpui lo awm turah pawh eirukna chungchang agenda hian sawi a hlawh hle dawn ni te pawhin a lang a ni. Hetiang khawpa kan duh loh ram pumin a kan do a nih chuan, hetiang lama inhnamhnawihte chu kan hnawl ngam a ngai tawh a ni," a ti bawk.