ZALEN April 4, 2025 : Congress Party chuan vawiin khan Congress Bhavan Golden Hall-ah Political Session hun an hmang a, he huna thusawitu MPCC President Lal Thanzara chuan ZPM sawrkar hi awm mai mai mah se, AR te hi an chhuak dawn tho niin a sawi.

Lal Thanzara chuan, "Nimin lawkah Vanapa Hall-ah AR sawn chhuah ZPM party in an lawm a. Mak tak maiin Home Minister leh a chekawite an tel lo. Rajiv Gandhi Aizawla a lo kallaia AR sawn chhuah lo diltute leh Pu Rajiva'n a tiamte kha ZPM hi chu an ni lo. Khami kal zelah ZPM sawrkar laiin an insawnchhuak mai a ni. ZPM sawrkar hi awm mai mai mahse an chhuak dawn tho."

"Congress party-in engmah thawh nei lo anga min sawite phei hi chu chunglamin thudik a hria. Congress Sawrkar laiin Assam Rifles te sawn chhuak turin theihtawpin hma kan la. Nimahsela, Sawrkarah demand siamin Kar khat chhungin tui litre nuai 4 leh sing 5 pe tur te, Electric chungchangah pawh demand sang tak an nei a. Keini chuan, kan mipuite pawh hetianga tam tui kan pe thei lova chuvangin kan tihhlawhtlin sak thei lo che u, kan ti."

"Tin, an chenna buiding zawng zawng pawh Sawrkarin khul turin min ti a. Keini chuan kan mamawh ve lo, in duh leh thiat vek u la, a hmanrua pawh la vek rawh u, kan ti a. Vawiin niah ZPM Sawrkarin chung thilte chu tihsak vek an intiam a. Assam Rifles-in sawn chhuak hi a lawmawm viau rualin lawm erawh a kim lo a ni," a ti.

Health Minister lo ni tawh Lal Thanzara chuan, tuna ZPM Sawrkarin Health Care a kalpui dan turah mipui leh Sawrkar hnathawk atangin pawisa tam tak lak sak tumna a awm a. A chhawr tangkaitu tur mirethei tak tak zawkte hian he Health Care hi an chhawr tangkai thei ang em tih hi ngaihtuah tham tak a ni a. Pathian leh mipuite zara Congress Party kan Sawrkar hunah mipuite tlin tawk Health Care kan kalpui dawn a ni," a ti.

Vanglaini chanchinbuin sawhthing lei chungchang a rawn tarlan chungchang chu sawiin Pu Lal Thanzara chuan, "Aizawl District bikah qtl 2,761 lei tawhin la lei loh hi qtl 26,759 a awm tih a sawi a. Tun hnaiah kan CM leh Finance Minister ni bawk chuan Vaibelchhe 1,090 lai mai sum hman ban an neih thu a sawi a. He an sum hman ban atang hian Sawhthing leh hmunphiah te hi lei sak ngei turin ka phut a ni," a ti bawk.