ZALEN February 3, 2025 : Aizawl Municipal Corporation Mayor Lalrinenga Sailo chuan, "Mizoram sawrkar-in Local Council leh Village Council inthlan a tihhma chhanah hian chhuanlam tling a awm lo. LC leh VC te sawrkar thawhpui thei lo an awm lo a, ZPM sawrkar hian Party dang LC leh VC-te a thawhpui thei lo a ni zawk," a ti.

Mizo Hnam Run chhung inkhawma thu a sawinaah Aizawl Mayor chuan Local Council te phei chu AMC hnuai an nih thu a sawiin, "AMC area-ah phei chuan hmasawnna hna tur hmachhawp kan ngah em em a. Kum 2023-2024 fund central lam atanga lokal tur Vaibelchhe 15 chuang a la awm a, 2024-2025 chhungin development fund vaibelchhe 29 chuang lokal tur a la awm a. Keimahni thawhchhuah ve sum vaibelchhe 13 vel a la awm bawk a ni," a ti. "Hmasawnna hna thawh tur LC ten an la neih teuh laia an term nasa taka pawh tawi sak hi a dik lo a, an mahni thlang tlingtu mipuite zah lohna a ni," a ti bawk.

MNF Adviser Rinenga Sailo chuan, "ZPM sawrkar atanga kum khat pawh tling lovah Sinlung Hills Council kan inthlang a. MNF-in sawrkarna kan la a, tun LC leh VC inthlanah pawh hian beiseina sang tak MNF chuan kan nei a. Congress sawrkar vanglaiin AMC-ah MNF kan sawrkar thei a, mipuite hian party an en vak lo niin a lang a. Tun tum LC leh VC thlanah pawh hian MNF-in hnehna sang tak kan chan ngei ka beisei," a ti bawk.

Rinenga chuan, "ZPM sawrkar tirh khan mipuiin beiseina kan nei sang hle a. Ram changkangte tih danin ni 100 chhunga an tih turte an puang a. Mipui pawh kan phur hle a, mahse, an hlawhtlinna percent a sang lo hle. Aikal lak, posting, sum remchem leh kawng dang tam takah an sawi loh ang hlirin ZPM hi an awm a ni," a ti bawk.