ZALEN April 11, 2025 : Excise & Narcotics Department-a Senior officer te chuan vawiin khan Commissionerate of Excise & Narcotics building Conference hall-ah Crime Review Meeting an nei.

Meeting hian MLP Amendment Act, 2025 chuan Mizoram pum a huap tawh tur thu te, wine siam phalna nei lo man theih an ni thu leh Hotel, Restaurant, Club, Homestay, Recreation Centre, Picnic Spot-a zu, wine leh beer kawl te dapchhuah hna ngawrh takin thawh a nih thu an sawi.

Meeting hi Z. Lalhmangaiha, Commissioner of Excise & Narcotics chuan a kaihruai a. Senior officers te bakah district hrang hranga Assistant Commissioner te an tel kim vek a ni.

Meeting-ah hian tunhnai lawka Mizoram Sawrkarin The Mizoram Liquor Prohibition Act, 2025 a pawm, The Mizoram Gazette-ah 20th March, 2025-a Sawrkar notification hmanga a tihchhuah tak chungchanga hmalak dan tur hetiang sawiho a ni:

Zu khapna Danpui, MLP Amendment Act, 2025 hnuaia zu khapna hian Mizoram pumpui a huam tawh ang. Tunhmaa he danin a huam loh, District Council 3 – Mara, Lai leh Chakma Autonomous District Council chhungah pawh he Dan hi khauh taka kenkawh a ni tawh dawn a ni.

Mizoram Sawrkarin wine siam phalna a pek 3 –Hnahlan Winery, Tlangsam Winery leh B.CH. Winery atang chauhva siam chhuah wine chauh zawrh phal a ni. Hemite ni lo wine emaw, alcohol tel in tur dang siam reng reng chu MLP Amendment Act 2025-in a khap avangin man theih vek an ni a, dan bawhchhetute pawh na taka hrem theih an ni.

Tunlaia Mizoram hmun hrang hranga Hotel, Restaurant, Club, Homestay, Recreation Centre, Picnic Spot etc. thenkhata zu, wine leh beer in tur leh lei tur atana hmuh tur awmte pawh hi MLP Amendment Act 2025-in a khap avangin man theih vek an ni a, dan bawhchhetute pawh na taka hrem theih an ni a, hetianga dan bawhchhiatna dapchhuahna hna pawh ngawrh taka kalpui mek a ni.

Hengte avang hian Sorkarin a phalloh thil laka inthiarfihlim tur leh MLP (Amendment) Act 2025 bawhchhe lo turin Excise & Narcotics Department chuan mipuite a ngen a ni.

He Crime Review Meeting-ah hian tun hnaia Mizoram Sawrkarin thil chi hrang hranga Excise & Narcotics Department a thuam avanga lawmthu an sawi a. Department hmasawnna tur thil hrang hrang bakah tunlaia Mizoram dung leh vanga ruihhlo hluar ta lutuk do let dan tur sawiho a ni bawk.