Aizawl: Mizoram sawrkarin Mizoram Liquor Prohibition and Control Act, 2014 zirchiang tura a din MLPC study group chuan an report an peih tawh a, naktuk Thawhtanni hian Excise & Narcotics Minister R.Lalzirliana hnenah thehluh an tum. Zalen palaiin MLPC study group Convener Dominic Lalhmangaiha hnen atanga thu a dawn danin study team hian zuin Mizoram khawtlang a nghawng dan an zir ber tih a sawi a. An thil hmuhdan an thehluh chu sawrkarin tul a tih angin a la zirchiang leh dawn niin a sawi. MLPC study group zinga mi Dr. Laldinliana Varte chuan kum chanve chhung vel zirchianna an nei tih sawiin, “Kan tih theih chinah chuan theihtawp kan chhuah a; mahse, hun a rei tawk loh deuh avangin duhthusam chu a tling lo mai thei a ni,” a ti. Zawhna chhangin National Institute of Mental Health & Neuro Sciences (NIMHANS) HoD Dr. Vivek Benegal an chah chhuah chhan chu ruihhlo enkawl kawnga mithiam anih avang leh an report te thlirpui tura an duh vang niin a sawi bawk. Dr  Benegal hi Zirtawpni khan Aijal Club-ah Research Group te hian an thutpui bawk a ni. Zu zirchianna hmun tak taka lo nei tawh Dr Benegal chu ZALEN chuan be pawpin a ni chuan MLPC Research Group te’n report an siam chu chipchiar a tih thu leh thil thar a zir hial thu a sawi a. ‘“Rawtna hi tam tak a awm thei a, thil tam tak a awm a, chung zingah chuan demand leh supply tihtlema a kalkawp a pawimawh ka ti,” tiin a sawi a ni. Dr Laldinliana chuan, “Kan zir dan hi chi hnihin a kal thei a, a hlawkna kan zir a, a chhiatna kan zir a, chumi chu khaikhin a ni ta a ni. Zir dan hi a zau ang reng a, zu inten an hlawkpui em? tih atanga inchhunga tharum thawhna a thlen dan thlengin a huam a, lai takin zirna hi kan theihtawpin kan kalpui a ni,” tiin  Zalen zawhna a chhang bawk. Zu vanga hnathawh a buai dante, zu vanga man tawk, zu vanga thi te tha hloh awm theih dan leh a dangte  lakhawmin zirchian a nih thu Dr Madina chuan a sawi bawk. Hetih rual hian zu in sum a chawk luh dan te, hna a siam dan te leh a dangte zir a ni bawk a ni. Health Cost lam nasa taka zir a nih thu Dr Lalbiakzuala chuan a sawi  a. Zu vanga hriselna chhia, thi, trauma, hliam leh accident case lut te lepse niin chumi atana senso chu chhut chhuah a ni a. Sawrkarin zu kaihhnawih damlohna avanga sum a sen hre turin damdawi in tam takah sample proforma thahnem tak siamin chumi ‘data’ lakkhawm atangin kimchang thei ang bera an zir thu a sawi a ni. Thulaknain a tarlan dan chuan zu vanga Police leh judicial cost zir a ni bawka, domestic violence leh a kaihhnawih bakah, “Kohhranin zu do kawngah eng ang takin nge tha/sum a sen?” tih te pawh zirchian a ni. Commercial sex worker-ah zuin anmahni leh a dawrtute a nghawng dante zirnaah hian a tel bawk.