Zawhna: Tunlai nau piang tam takah hian engvanga eng (jaundice/mitliam) kan tih ang hi a tam em em le? Tun hma khan hetianga naupang eng hi an tam pawh kan hre ngai si lo a. Tunah chuan a ‘eng’ leh an ‘up’ tih tawngkamte hi tawngkam tlanglawn a ni ta der mai a. Hmasawnna zelah chuan eng hi tlem tial tial awm. Min chhang thei em khawngaihin?

Chhanna: Jaundice (Mitliam) kan tih hi kan taksaah kan thin (liver)-in a sawngbawl theih bak aia tam Bilirubin a awm vanga lo thleng thin a ni. Bilirubin hi kan thisen a timur sen (red blood cells-RBC) hlui/upa tawh thinin a lo theh darh atanga lo awm a ni a, chumi chu kan ekah a tla thla ta thin a ni. RBC-te hi kan taksaa Oxygen sem darhtu an ni a, thin a chak loh emaw RBC keh darh a tam lutuk hian bilirubin kha kan taksa ah a awm khawl tam ta lutuk a, vunah leh mitah a lo lang ta a, kan lo eng ta mai thin a ni.
Naupiang hlim hi an thin a la chak tawk lo va, chu bakah chuan an pian hmaa an RBC kha a dang bik a, an pian chiah hian a keh darh nasa a, a inthlak nghal thuai bawk a, an thisen ah bilirubin a insiam tam hma a, hnute an hnek vat loh phei chuan an ek a la insiam mumal loh vangin bilirubin paih chhuah dan a buai a, an eng ta mai thin a ni, chu chu Neonatal Jaundice an ti. Thin tha lo engemaw vang te, thisen lama fel lo awm vang te, infection vang te, thin atanga bile chhuahna bile duct in-block vang te, boruak hip luh tlem vang te, an rawn pian laia hliam awm eng emaw vangtein mitliam hi a lo awm thei a ni.
Nau zai chhuahah hian infection laka ven a ngaih vangin antibiotic pek tel a ngai thin a; tin, nau vei tawh chunga nei mai thei lo te, forcep hmanga cheh chhuah ngaite hi inhliam a awl zual a, chu bakah chuan nautein hnute a hnek lawk loh a, nu hnute tui insiam mai a awm loh vang te hian an eng hma thin a ni. Nu kum tam tawh hnua nau neiahte pawh a awm hma viau bawk a; tin, nau pian hun aia tlaia pai (post-dated pregnancy). Engpawhnise, Neonatal Jaundice awm chhan hi tam tak a awm thei a, i rawn sawi ang hian tun hnaiah nau piang eng hi a common ta ang reng viau mai a, a thlen loh nana kan hriat tur awm angte han sawi ta ila.
Nau neih danah hian nuin nau a vei hun takah a vei a (vei chawptir ni lovin), natural taka nau a neih a, a neih ve leha hnute a hnektir nghal hi a pawimawhin nau eng laka invenna pawimawh hmasa ber chu a ni awm e. Nuin nau a pai laia a hriselna pawh factor pawimawh tak a ni. Nupui pasal kan inneih hun a tlai tial tial a, hmeichhia hi an kum a lo tam chuan nau an har tial tial a, complication pawh a awm duh zual bik a ni. Thenkhat chu nau neih pangngaia neih an huphurh vang hian zai an thlang fo bawk. Nau zai chhuah hi sawi tak angin a buangbar hle mai a, nu a che lawk thei lo va, hnute pek kawngah pawh harsatna a tawk awl bik a ni.
Nau piang hlim hian nu hnute an hnek that a pawimawh khawp mai a. Hnute tui hi nautein hnute a zuk hnek phawt loh chuan a insiam mai thei lo va, nautein a zuk hnek khan sucking reflex a lo awm a, chu chuan nu thluak lama hnute tui siam tirtu hormone kha a rawn khawih che a, hnute a lo tang a, hnute tui chu a rawn hne chhuak ta mai thin a ni. Chuvang tak chuan nau an pian hlima nu hnute hnektir nghal hi a pawimawh em em mai a ni. Hnute tui a chhuah lawk loh khan thenkhat chu an mangang a, bottle-feed nghal mai an tum ta thin a, nautein bottle feed a in hmasak zawk si chuan a nu hnute kha a hne leh lawk duh ta thin lo va, hnute tui a insiam har phah thin bawk a ni.
Nu naupai lai hi naute tha tak leh hrisel taka a lo pian nan an inenkawl uluk a pawimawh khawp mai. Ei leh inah te, taksa sawizawi leh chet tam ah te, zuk leh hmuam leh thil tha lo dang laka insum te, damdawi ei mai mai loh te a pawimawh hle. A hun taka in check up te a pawimawh a, rilru leh taksa hah lutuk lova an awmte a pawimawh hle bawk. Kum tam hnua nau pai phei chu fimkhur lehzual a pawimawh. Engpawh nise, neih pangngaia nau neih tluk a awm thei lo va, nu a hrisel that phawt chuan nau vei hun nghah thlen hram theih nise, neih pangngai ngeia nau neih hram tum zel ila, chu chuan Neonatal Jaundice pawh hi a titlem ngeiin a rinawm. Tin, nau piang hlim hi an la derthawng a, inkan luai luai te hi insum thei ila a tha hle.