Hriselna lam chungchang kan sawi zinga kan sawi ngun pawl tak chu taksa sawizawi ‘Exercise’ leh ei leh in ‘Diet’ hi a ni awm e. Kan taksa hrisel tur chuan ei leh in te leh taksa sawizawi leh chet tam hi a pawimawh rual rualin a in-balance that a pawimawh em em mai a. Kan taksain ei leh in a kan lakluh hi kan mamawh chin bak a nih chuan a chuangbâng apiang a inkhawl a, mawm lam leh thlum lam chi a luh tam phei chuan thisen thlum Diabetes te leh thau tam vanga liver lam fel lo te, thisen zama thau bet vanga a bang chhah Atherosclerosis te pawh a thleng fo reng a ni. Vitamin te pawh hi kan taksain a mamawh rual rualin a tam lutuk chuan Hypervitaminosis an tih mai harsatna a thleng thei bawk a ni.

Khawvel a changkan ang zelin mi tam takin kan hriselna kan ngai pawimawh a, internet lamah te pawh kan zir tam tial tial a, intih hmuh lam thilah chuan a tha hle mai. Kan hriat tur pawimawh erawh chu hriselna lam kaihhnawih ah hian a ziaktu te rilru a pawimawh hle tih hi. Company in an product an tih lar duh chuan a thatna lam fak piah lamah hian thil dang an dah nep fo thin a. Entir nan, ek that nan fiber tam a pawimawh tih hi medical lama kan ngaihdan chu ni mah se ei tam lutuk a, a balance tur thil dang kan ei chhiat leh si chuan digestion buai a thlen thei ve tlat bawk a ni. Ei leh in chungchangah pawh hian hriat dik tawk loh kan neih fo ni a lang chu a tam leh tlem lam leh a quality hi a nih hmel. Hnam hrang hrangin ei leh in dan phung kan nei a, a chhe bik han tih ngawt tur a awm hran lo. Chu ai zawk chuan kan taksa mamawh zat kan la lut em? kan ei tam lutuk em? Sa ei ngai loh vangin kan ei hi a chhia kan ti fo mai a, sa ei tam aia chawhmeh dang protein nei tha zawk te pawh a awm a, chuvangin kan ei leh in kan tehna tur pawimawh tak chu ‘Balanced Diet’ a ni em tih hi a ni.

Balanced diet-ah chuan kan taksa mamawh carbohydrates, fats, protein, vitamin, minerals-te hi a mawi tawk a awm tur a ni. Tun hnai chho hian sa kan ei nasa ta khawp mai a, kan tih phung ni vak ngai lo, chaw tel lova sa lawnga ei te pawh KFC awm hnu te hian kan intihhmuh titihte pawh a ang viau. Sa hi protein tamna chu ani ngei mai, mahse thau a awm lo thei lova, chuvang tak chuan sa ei pawha diet lam thiamten an sawi lar chu ‘Lean Meat’ an tih, a thau tlemna lai zel hi a ni. Keini sa ei danah hi chuan a mawm hmak loh chuan tui hi kan ti lo leh tumhrang bawk si a, chuvang chuan kan sa ei dante pawh hi hriselna lam kan ngai pawimawh chho zel dawn anih chuan kan thlak danglam hret hret chu a la ngai ngei ang.

A dang leh ah chuan taksa sawizawi hi a ni. Kan hriselna atan hian exercise hi kan mamawh khawp mai a, chutih laia kan hriat tur pawimawh tak mai chu kan taksa rih dan te, kan kum zat te, kan ei leh in dan azirin exercise chin tawk hi kan hriat a pawimawh viau. Naupang lam leh la thalai deuh ah chuan taksa a la in siamrem hma a, eng emaw chenah chuan over lam deuh a an exercise pawhin a la zia thei deuh anga (a tha ber e tihna chu a ni chuang lo va). Kum 35 pelh tawh hnu lam hi chuan ruh chuktuahte pawh a lo nal tawh lo va, intihpalh a awl khawp mai a, exercise lak hi fimkhur deuh a tha hle a ni. Kum a tam tawh hnuah fitness lam uar vangin physical game, entir nan badminton te hi ching thar leh an awm fo mai a. Thlan a lo tlak that deuh chuan duh aia rei leh nasa inkhelh a lo awl a, kawng leh dar ti na an awm fo mai. Chutiang avang chuan exercise chungchanga hman atanga vawiin thlenga mi thiam tam berin an la chawh chu ke a kal ‘walking’ hi a ni. A him a, taksa leh lungin a ngeih a, intihpalh pawh a tlem ber bawk a ni. Chuti chung chuan han belh leh hlek kan duh chu walk pawh hi tih over chuan tihrawl a kham a, tha chat ang chite a thlen ve thei a ni.

Chuvangin, kan thupui ang hian ei leh in lam leh taksa sawizawi chungchang ah hian a tha chu a awm ngei a, mahse chin tawk hriat a pawimawh hle ani. Exercise ti nasa, a bikin bodybuilding lama tui mi te pawhin damdawi ei te an intihhmuh zel a, mithiam rawn nachang hriat a tha hle. Supplements lam kan ei dawn anih chuan kan lung leh kal (heart and kidney) lam check fel hmasak zel ni thei se a duhawm hle a ni.