Tleirawlte hriselna chungchang hi issue hmasa lamah kan rawn ziak tawh a. Khatah khan Nutrition leh Physical Health (ei leh in leh taksa lam hriselna) kan ziak nual anih kha. Tleirawl te hriselna lama pawimawh tak pakhat, kan sawrkar hmalaknaah pawh a hranpa ngata program awm, Sexual and Reproductive Health (mipa leh hmeichhia lam te, inthlahpunna lam hawi tiin sawi ta mai ila) hi tun tum chu i han ziak leh dawn teh ang. Naupang atanga tleirawl an lo nih chhoh hian an taksaah hormones-in danglamna nasa tak a rawn thlen a, an taksa mai ni lovin rilru leh ngaihtuahna, mahni inhriat chianna te, hmel duh zawng te, sex hmang thei tur leh inthlahpung thei tura an taksa peng hrang hrang rawn danglam tam tak a awm a ni. Heng thilte hi thil nih phung pangngai tak a nih avangin inhrilh hriat emaw zir chiang tul lem lo nia ngaihna te pawh kan nei ani mai thei. Tunhma hun ngaihtuah phei chuan hetiang zawng inzirtirna hi tuna puitling tam zawk hian kan dawng kher lo vang. Mahse, kan chenna khawvel leh hriatna pung nasa hian ngaihdan leh hriat dan a rawn tidanglam nasa ta em em a, inlaichinna thlenga a nghawng tak avang hian tunlai khawvel tleirawlte hi information dik, nun kawng kaihruai thei leh harsatna thui zawk laka veng thei zirtirna kan pek a tul ta hle a ni. Mipa chu a lo thanlen a, zan lamah a lo mutlik (wet dreams, nightfalls) atang hian chi thlah thei a lo ni ta a, chutiang bawkin hmeichhia pawhin thranthi a neih atangin nau a lo pai thei ta a ni. Heng thil pahnih - mutlik leh thanthi neih hi min timihringtu a ni a, a lo thlen loh chuan chi thlah theih loh (ching) a thlen thei a ni. Hmeichhiain kum 16 a tlin hnu thleng pawha thanthi a neih loh chuan thil fel lo a awm anga ngaih tur a ni a, check chian a ngai a ni. Chutiangin mipa pawh a chi a chhuah theih loh chuan check chian a ngai bawk. Heng piah lamah hian an hormones avanga taksa inthlak danglam tam tak a awm a. Hmeichhe thenkhat chu hormones buai vang hian mipa ang maia hmul ngah leh, a then phei chu hmuihmul ang nei hial pawh a awm theih a ni. Mipa lamah chuan mahni inhrawt (masturbation) te hi an hriatthiam loh chuan buaina thlen thei tak a ni (zawhna pawh ka dawng fo bawk). A dang lehah chuan mi dang nena inlaichinna (relationship) hi a ni. A bik takin ngaihzawng neih chungchangah a ni lehzual a. Hmeichhia zingah hian common ang reng tak chu fa neih mai chakna leh, enkawl leh chawm thei mai tura inrinna awm fote hi a ni. Inngaihzawnna chungchangah pawh hian sex nena inzawm tlat anga hria, ngaihzawngte nena sex hman chu a tur ve reng (natural process) a ngai an awm fo mai bawk. An information dawnna tam ber chu thiante bakah internet leh magazine te a ni a, hengah te hian nupui pasal neih chungchang te, virginity chungchang leh a pawimawhna te, sex tak tak hmang kher lo pawha him taka intihlawm dan (safe sex) chungchang te hi a tlem leh lawi si a, chutih a hnekin sex hman nawm dan, ngaihzawng kawpte pawh experience atan a pawi lo tih ang reng te a ni fo zawk. Hei tak hi nu leh pa tam zawk hian kan hrilhin kan zirtir/titipui ngai mang lo va, chuvangin an film en leh lehkhabu chhiarte chuan an ngaihtuahna a kaihruai nasa zawk a, an puitlin thlenga ngaihdan siamsaktu an ni zawk fo a ni. Mahni anpui kawp (homosexuality) chungchangah pawh hian tunlai tleirawl te hi an ngaihdan a zau nasa tawh khawp mai a, hriatthiamna an nei thui viau mai bawk. Kan sakhuana (Kristianna) nen a inhne rem mai si lo leh, helamah hian kohhrante pawh kan la bangbo ang reng viau maite hi fuh lo a la tam khawp mai. Hengte bakah a hma lama kan sawi takte hian sex hman atanga kai theih natna, sexually transmitted infection (STI) te, HIV& AIDS leh Hepatitis B/C lakah hian a tiderthawng zual a ni. Tunlai tleirawl leh thalai inngaizawng sex hmangte hi a tam ber chuan invenna an hmang ngai lo va, chu mai ni lovin hman hi inrinhlelhna ang zawnga an ngaih avangin heng sex kaihhnawih natna lakah hian an derthawng zual hle a ni. Naupai chungchangah pawh hian a awmzia hre lova nau pai ve tawp, an dinhmun an hriat hnua hmalak dan tur hre lova chiaite hi ka lo hmu ve ta fo mai. Nau an tihtlakin an hriselnain a tuar thei a, a thenah phei chuan an thiante thurawn anga damdawi hmang ta maite hi an tam sawt khawp a, buai an awm leh zauh thin (thi put reh thei lo ang chi te). Nau an tihtlak loh lahin nupa a han insiam turin an kumten a lo la tlin lo nen, bakah mipa lam lah hian an nei ngam lo fo mai a, naupang te-a nau neia thlawipui an awm fo mai ta bawk. A tuartu chu an fate chu an ni leh si thin. Nupaah lo insiam pawh nise chhungkua din turin an rilruin a la tlin ngang si lo va, chhungkua harsatna hrang hrang a siam phah fo a ni. Phone-a min rawn bia, tihngaihna hre si lote hi ka lo dawngsawng leh nawlh thin a, thurawn pek thiam a har thin hle a ni. Heng bak hi sawi tur tam tak awm mahse hemi chin hi duh tawk mai ila. A chunga kan rawn tarlan harsatna hrang hrangte lakah hian kan fa tleirawl te hi nu leh pa in kan veng thei a, an mamawh chu kaihhruaina tha a ni. Anmahni hriat hriata hre tura thlahthlam ngawt lovin keimahni lam pawh inzir belhin fuih ila, zirtir bawk ila, hetiang lama kaihruai thei tur mi thiam (Psychologist) te hnenah pawh hruai nachang hria ila, kan fate hi puitling turin kan pui thei ngei ang. Tunhma leh tun hun hi a inthlau hle tawh a, keini nu leh pa lam pawh kan in-update hi a ngai zel a ni tih hi i pawm thiam ang u.