Mihring pung zel leh sum leh pai lama hmasawnna avangin in leh lo tha pui pui a ding zel a, chutih ruala lirthei chi hrang hrang a pun zel bawk avangin khawpui a tawt zo a, Aizawl khawpuia kawng zim tak takte hi ke a kalte leh mipuiin kan inchuh a, kawng nek rana insa tawk an awm zel avangin kan chep tlang em em vek a ni ta ber. Tuna Aizawlin harsatna a tawh langsar ber pawh hi kawngpuia lirthei inhnawh tawt (traffic jam/congestion) hi a ni ngei ang. Traffic jam hi ni tina thil thleng pangngai ni tawh a, a kum telin a nasa tial tial a, pisa chawlh niah pawh a jam ta fo mai. Hetia kan kal zel a, tih tak taka hmalakna a awm loh reng chuan kan hmabak hi a ropui lo khawp ang. Kan harsatna langsar ber pakhat a ni chung hian traffic jam leh a kaihhnawih lirthei dahna (parking) chungchang hi tunhma atangin ram hruaitute hian an sawi khat khawp mai a. Hman atangin sorkar hmalakna lian tham hmuh tur a la awm lo a, kan hmuh chhun - school timing sawn hma te, taxi leh city bus intlan chhawk te, parking fee tihsan te, garage neih ngei ngei tur tih te, lirthei tlan dan tihdanglam te lah hian awmzia a nei thei tak tak hek lo. Hetianga hmalakna te phei hi chu harsatna sutkianna tur tak tak tling lo, rei lo te atana tihziaawmna tur chauh a ni. A nihna takah chuan traffic jam hi ministry aiin mipui leh traffic police-te hian kan vei zawk ni hialin a lang, lirthei inhnawh tawt kara kal tlang par par theite tan chuan mutmawh hnarmawh a neih pawh a har viau a ni maithei. Traffic police-te hi an thawkrim em a, sorkar hnathawk zingah faktlak a hnathawk tlem te zinga mi an ni, hetiang khawp hian tang lo se la chuan Aizawl hi a buai nuaih nuaih nitin hial ang. Lehlamah chuan lirthei inhnawh tawt vanga harsatna hi chu khawpui danga an buaina pawh a ni ve tho mai a. Aizawl anga ruahmanna mumal awm lem lo a khawpui thang vakah te hian kawngpui tha te, lirthei dahna te, bawlhhlawh paihna te, bazar te leh mihring pung zelin an mamawh tur thil tam tak hi ngaihthah a ni fo thin. Aizawl phei hi chu tlangpang leh hmun awih taka din a nih avangin a thang chhe tial tial a ni ber a, ruahmanna fel fai awm lo a mihring kan inhnawh khawm tam zel avangin a tiatpui khawpui dang aiin veivahna a tlem a, kawngpui pawh a tawi a, a zim bawk a. Chuvangin, state danga phaizawl khawpuite aiin kan harsatna tawh hi a nasa zawk lo thei lo a. Traffic jam hian mipui min nghawng dan te, kan eizawnna leh kan hnathawh a nghawng dan te hi chhui tham a tling a. Hmun dang aiin lirthei tui (petrol/diesel) hman tam a ngaih phah a, taxi/bus fare a san phah a, chu chuan mipui min nghawng a, hun a ei hek a, kan tihtur kan tlai phah fo avangin traffic jam mil a insiamrem a tul thin a, a hun taka thiltih kan tlin loh phah a, chu chuan kan hnam zia thlengin a nghawng tawh. Hun bi tuk sa ngaihpawimawh lohna a thlen a, function pawimawhah khuallian ho a kan tlai pawhin kan inthlahrung lem lo a nih hi. Traffic jam vanga nitina kan hun leh thil dang kan hloh te hi pawisa a a hlutna chhut chiah ta ila, Cheng nuai tam tak a tling ngei ang. Rikrum thilah pawh a chet zung zung theih loh a, tawng thu chhe loah chhiatna nasa deuh te hi lo thleng palh ta se kan buai dan tur hi sawiin a siak lo. Chuvang chuan traffic jam chungchang leh motor parking chungchang hi Aizawl chunga thuneitute tan chuan vei tak tak a hun tawh a, a harsa dawn tih pawh a chiang a, chona a tling a, ruahmanna tha tak nena huaisen taka hmalak a ngai dawn tih a chiang a, chutiang rilru chu an put lawk pawh a ngai tak zet a ni. Mi ramah chuan khawpuia lirthei tlan dan tur leh kawngpuia lirthei a inhnawhtawt lohna tura ruahmanna siamtute hi mithiam te an ni thin a. Keiniah chuan traffic police-te leh transport authority-te leh tunhnaiah municipal council-ten hma an la deuh ber thin a, an thahnemngaihna a ropui viau rualin ram dang angin mathematician-te, engineer-te traffic modelling/equation-te siamtir ve chi a ni maithei, computer hmanga ruahmanna fel tak nena hmalak ni thin ta se awmzia pawh a awm zawkin a rinawm. Khawpuia lirthei awm zatte, kawngpuia lirthei tlan dan te, kawngpui zau zawng leh mipui veivak tam lam te chhut a, harsatna chingfel tura mithiamte rawn chunga hmalak nachang hriat a hun ta khawp mai. Sorkarin sum harsatna a tawk mek a, zep thu a awm lo a kan ram hruaitute pawh an mangang ru viau a ni. Mahse, sorkar laipui hmalakna langsar kan hmuh zingah India ram chhung khawpui hrang hrang tihchangkanna tur te a tel a, kan hruaitute hian vei tak taka an vei chuan Aizawl traffic jam harsatna sutkian dan tur hi an hre em emin a rinawm. Khawpui danga an neih thin lirthei tam tak dahna (multilevel parking) te pawh hi hmun thenkhatah chuan a siam ve theihin a rinawm. Entirnan, Assembly House ep a secretariat building-te hi thiah a, lirthei dahna tur liau liau a siam ni ta se, tunhmaa lirthei dahna ni thin tuten emaw in an lo sak hnan tak te (e.g. bazar bungkawn traffic point bul) hi parking atan hman leh theih ni ta se. Vanapa Hall pawh hi sak that vat ngai khawp a hlui tawh a ni a, lirthei dah thahnem tak dahna tur hisap tela sak ni ta se, kawngpui kama in neite hi an ram teh that sak vek ni ta bawk se a zau phah hawkin a rinawm bawk. Kawngpui kama sorkar leh mimal ram te pawh a theih ang ang lirthei dahna atan lei sak dan te awm ta se. Hman deuh khan Assam minister pakhatin Guwahati khawpui traffic tihzangkhaina atan multilevel parking hmun tur lo zawng tur leh ruahmanna siam tur committee sang din a nih thu a sawi a, chutiang deuh chuan Aizawl harsatna sutkianna atan hian kan sorkar hian tih tak taka hma a lak ve hi a ngai tawh a ni. Ram hruaitute hian khelmual tha te, phullem phah te ai hi chuan motor parking hi Aizawlin a mamawh zawk tih hi ngaihtuah ta se, mipuite pawh hian kan mamawh tak tak zawk hi vei ila, buaipui ta ila a tha ang mawle.