Mizo historian hmasa K.Zawla sawi dan chuan kum 1818 khan Sailo lal ropui Lalsavunga Aizawlah a kai a (thenkhat chuan 1820 an ti), a pasaltha hmingthang Vanapa te, Chawngduma te, Tawkthiala te ho vanglai a ni bawk a, chung hun lai chuan sa leh ralah han khing pha an awm meuh lo. Hun a lo kal zel a, kan ram thenawmte rawn hneha awptu saphoten Mizo lalte nena an inremna bawhchhiain ramri pelin an rawn invalh lut zel a. Chu chuan pasalthate rilru a chawk tho a, ramri humhim turin beihpui an thlak ta a. Mahse, khatih hunlaia khawvela hnam chak ber, an leido apiang hneh zel thin kumpinu sorkar meuh chu an hneh ta bik lo a, zat leh zat, ralthuam inang hmanga inbei ni ta se kan pasalthate kha an tlawm bik hauh lo ang le. Tichuan kum 1890 atangin Kumpinuin Mizoram a awp tan ta a. April 22,1890 khan North Lushai Hills Political Officer atana ruat Captain H.R.Browne chuan Aizawl Bawrhsap hmasa ber ni turin he hna hi a zawm a. Lt. Colonel J.Shakespear (Bawrhsap Tarmita) sawi dan chuan hemi kum thal lai hian Dally sap hoin Silchar Miltary Police battalion sipai 400 an lo thleng a. Dally sap rawtna angin Aizawl chu sipai hmunpui atan buatsaih a ni ta a. Chutihlai chuan ramngaw chhah tak a la ni a, sipai inkulhna hmun atana thlan a nih tak hnu chuan kulh te an siam a, in te an sa a, mei mit loin khua a lo ding ta a ni. Kumin hi Aizawl kum 125-na champhaphak (Quasquicentennial) a ni a. Kum tir lam April ni 23 khan sapho kut chhuak Aizawl Bawrhsap Pisapuiin kum 125 a tlin champha hi DC leh a thawhpuiten an lawm nghe nghe. Anni bak hi Aizawl kum 125-na champha lawmna lam hawi buatsaih an la awm rih lo ni awm tak a ni. Aizawl hi a tirah sipai hmunpui a ni a, hun a lokal zel a, pem khawm an lo pun zel hnu a khua lo ni ta a ni a. Khawpui ni tura ruahmanna mumal awm lo a lo thang lian ta vak a nih avangin kawngpui a chep a, mipui hawi thawnvenna tur hmun awl a awm lo a, a pangper chhengchhia zawng zawngah in a ding zel a, rambuai hnu a mipui an pun tak hnuah phei chuan ram awl a awm meuh tawh lo a ni. Tlai khaw hnu tunlai thleng pawh hian khawpui din thar tura beihpui thlakna hmuh tur a awm meuh lo a ni. Chhiarpui hnuhnung ber 2011-ah khan mihring 293,416 an cheng a, chhiarpui a telh loh hmun dang atanga rawn inbengbel - zirlai, hnathawk, ram pawn lam mi, etc., thahnem tak an cheng reng a a tak takah chuan mihring nuai thum chuang fe he khawpuiah hian an cheng rengin a rinawm a. Krismas dawn bazar runpui lai phei hi chuan Mizoram mipui hmun nga a thena hmun hnih vel lai kan fuankhawm hial awm e. Aizawl tlang dung hi tuifinriat zawl atanga Metre 1,132 laia sang a ni a, a tlang pang hian tui a pawm tha hle a, kawr ni lem loah pawh tuihna tha tak tak a awm nual a, veng hrang hrangah tuikhur pawh a tam hle. A tlang dung phei, tui hip khawmtu thing awm lohna a chhip hnaihah te pawh hian tuihna tha tak tak a awm fur a ni. Leilung awm dan hi zir chian a tha khawp mai, lei tlahniam thin te, lei nghet lo tak tak te a awm nual a. Hmun thenkhatah hian a chhung lam lei hi a thawl viau a ni thei a, mipui nuai 3 chuang chenna atana a tlak meuh em tih te pawh khawl tha zawk hmanga lei chhung thlalak te nena zir chian chi a ni, chenna atana hlauhawm tak tak pawh a awm nual maithei. He khawpuiin Zofate thinlung a hmun a luah thuk em em mai hi a mak khawp mai bawk. A chhunga cheng tam ber hian rilru zim tak puin hnam chungchangah pawh Lusei tawng hmangte khawpui bik ang deuhin ngai thin mah ila Mizoram dung leh vanga chengte leh Mizoram state pawn lama Zo hnahthlak zawng zawngte lungkham, an tlawh chak em em leh an ngaihsan rawn khawpui a ni reng thung. Chuvangin, Aizawl hi Zo hnahthlak hmun hrang hranga chengte kaihruai theitu ber a ni. Germany inzawmkhawmna tura Prussian hegemony a pawimawh ang tlukin (Aizawl hawi lam hian kawngro a su si a) Aizawl hegemony hi Zofate inunauna leh inzawmkhawmna chungchangah te, Mizo nationalism chungchangah te hian a pawimawh hle a ni. Aizawlin a buaipui apiangte hi - zaithiam a ni emaw, fiamthu thiam a ni emaw, thuhriltu leh rawngbawltu lar pawh Zofate chenna khawvel a deng chhuak nghal zel a. Aizawla lar chu Zo hnahthlak zawng zawngten an hre ve thuai thin. Aizawla hralh tla chu Zofate chenna zawng zawngah hralh a tla thin. Chuvangin, Aizawla chengte hian rilru thar pu ta thut ila Zofate awpkhawmna hmunpui berah siamin, Chhinlung chhuak unau zawng zawng, Lusei/Duhlian/Hualngo tawng hmang leh chi bil tawng hmang zawng zawngte inlungrualna leh inunauna khawpui ni ta chiah phei se la chuan Zoram thar a thleng chawpchilh nghal ngei ang mawle. Veiawm ka tih deuh pakhat chu Aizawla lal hmasa ber, lal huaisen, namai lo zet Lalsavunga he khawpui hian a theihnghilh daih hi a ni. MNF sorkar lai a finance commission-in a rawn pek sports complex kha hun a lokal zel a, stadium sakna atan hman a ni ta a. A tir atanga hming atana ka lo duh em em Lalsavunga Khelmual ti ta lo chuan MNF sorkar khan vai hming Rajiv Gandhi Stadium an puttir ta daih a, congress sorkar tan thlak phal chi a nih hmel bawk si lo a. Mahse, mi ramah pawh hmingte hi chu an thlak fo bawk a, kan khawpui bera infiamna hmunpui ber hian vai hming a put hlen loh beisei phawt ila. Kan rama thil langsar leh hnam ro hlu tling tur an siam leh dawn chuan chief minister hming puttir leh ngawt thin lo hian Aizawl lal hlui hming emaw kan hnam tana mi pawimawh (pasaltha, lal, etc.,) hming puttir puttir thin ni tawh hram se.