Zawhna: Ka dar vei lam hi ka banbul ruh inchuktuahna lai takah hìan ka tihpalh pawh ka hre si lo a, a rawn na ringawt maia, eng nge maw tia han vai vel hian tlemin a zia deuh a. Mahse, a dam thei chuang si lo a, na tìa hna thulhna chi em chu a ni bawk si lo, mutte hi a nawm loh chang a tam mai. Doctor rawn lova dam hram ka duh sia, khawngaihin min tanpui theih chuan ka lawm khawp ang.

Chhanna: A hmasain i kum zat, mipa nge hmeichhia i nih tih te i rawn sawi lang tel lo va. Kum zat leh mipa/hmeichhia tihte hi natna awm chhan hriat nan chuan a pawimawh khawp mai a, zawhna zawt turte chuan sawi tel zel thei ila. Hei bakah hian hnathawhte pawh sawi lang thei ila, a nat chhan tur awm ang hriat a tiawl lehzual ngei ang.

Kum 40 hnuai lam lo ni ta la, eng emaw rit chawi, inchhung chet, leh hna hrâm deuh, thahrui heh chi thawh vang angah te pawh a ngaih theih ang a. Chutiang chu hriat lem loh laia intihpalh, tihrawl emaw ruh inchuktuahna lai vung vang te a nih hmel viau a. Kum 40 chung lamah chuan Frozen Shoulder tia kan sawi mai, Adhesive Capsulitis tia medical term an pek natna hi a nih duh hmel bawk. Hetiang natna hi taksa hman rim vang te, zunthlum nei rei tawhah te, thisen sang vanga stroke (a nasa lote pawh a awm thei a) vangte pawhin a awm fo thei a ni. Hmeichhia thi hul tawhah hian calcium tlakchham vangin ruh chuktuah fel lo a awm fo bawk. Ruhseh pui kan tih mai, Osteoarthritis natna hian ruh chuktuah liante pawh a khawih duh viau bawk.

Infiamna lam chi hrim hrim hi kum 40 kan pelh tawh hnuah chuan tih chin tawk hriat a pawimawh khawp mai. La naupan/thatlai deuh hun angin kan tihrawl leh ruh chuktuahte a che awlsam tawh lo va, intihpalh a awl zual hle. Tin, ruh chuktuah (joints) ho reng rengah hian shock absorber ang deuhin leh a chet tinal tur tuiril a awm thin a, chung tuirilte chu kum a lo tam telh telh hian a lo tlem tial tial bawk thin a; chuvangin, active sports lam hi kan ti a nih pawhin chin tawk hriat a tha hle a ni.

Natna enkawl kawngah chuan kan sawi fo tawh angin a chhan hriat phawt a pawimawh a. Ruh lam insawiselnaah chuan X-Ray tih hmasak theih hi nise a tha hle. A nat dan te, eng zawngin a tih chetin nge a na a rawn chhuah te hriat a tul ang a, ruh chuktuahah hian a hual veltu hamda chhungah a tinaltu tuiril a awm ve a, heng tuirilte hi a lo tlem chuan chet vel a tikhawr a, ruh inzawmna laia ruh hmawr hi a chhah a, chu chuan harsatna a siam ta thin a ni. A nat chhan hriat thuai hi a pawimawh a, a chhan chu chet luih hian a hliam emaw vung te a tizual thei a; chuvangin, Ortho doctor chu lo inentir thei la chu a tha ber a ni.

A enkawlna kawngah chuan Frozen Shoulder angte hi a nih chuan ruh chuktuahah steroid an chiu-sak thin a, hei hian a vung a tihreh bakah ruh chuktuah tuamtu capsule khawng zual tur a veng bawk a. Chet tam lohtir a pawimawh bawk ang. Ban awrhte hi mi thenkhat chu an chawh tel bawk thin. Lirthei khalh loh a him ber a, lirthei chuan hrim hrim pawh chuan tlem theih a tha bawk ang. Tin, a vung tihrehna atan leh ruh chet tinal zawnga pui thei damdawi thenkhat ei pawh a tul hmel. Ralkhat atanga damdawi inchawh chu a him hran loh avangin leh, hetiang lam damdawi ei hi chuan pumpui ven tel a ngaih fo vangin inentir chu i tan chuan a pawimawh ber a ni, a zual hmain.