Second khat lek pawh . . .

ICU chhúnga nun suala nikhaw hre loa mu mék Becca chu ka en tlawk tlawk a. Rei lo te chhúng tak tak chauh Becca hmu tùr chuan hun pêk ka ni. Ka hun neih chhun, hun tlem të chu—ka lo huat ve ’ngawt, sawi chhuak ngam loa min lo hmangaih rengtu—ka neih chhun Becca tä a ni e. Ka thlah liam tâk Leo lam ka ngaihtuah thei tawh lo.

Becca kut chu ka vuan reng a. A la vawt lo. A lum thar thar zâwk. Ka thlah phal tawh teuh lo mai! Ka mit atä mittui a rawn dïr zur zur a.

Chutia mipa thankin tawh han tah ngawt mai chu ka zak deuh a; mahse, keimah avànga Becca mittui tla tùr ka ngaihtuahin, a tam zozai dáwn hian ka hria a, insùm ka tum duh ta bîk lo a.

Ka insúm peih zozai ta bîk lo. Ka hmangaih Becca—eng mah hre tawh lo, kháwl hmanga an thâwktír mék chu ka zuk kuah a nih chu!

Nghet takin ka pawm vawng vawng a. Minute khat tal—ni e, second khat lek pawh min lo kuah lêt ve se, inpawm vawng vawng ila ka ti. Mahse, a ti dáwn si lo a. Chutianga kan awm chu ka ring lo hial zâwk! Chûng ka ngaihtuah chuan ka tap leh a . . .

Nurse nge tu nge rawn lût pawh ka hre lo—min rawn pawt hrangtu chu. Ka hmangaih Becca zàlna, ICU pindan atang chuan min kai chhuak a ni.

Ka mang vek a. Ka bíng mup mai. Ka chháw chhuih a. Ka chawmawlh chhawlh bawk. Ka thâw te pawh a hah. Ka nun chu, chawhnu ruih hian ka hria.

Ka chhuak chu, tün hma zawnga hlim taka min be siam siam thìntu, Becca nu—Nu Sangi chuan min lo kuah a. Kei paw’n ka kuah ve. Min kuahtu chu Becca nu a ni miau a; amah Becca ni loin! Chutah, ka tap leh a. Nu Sangi pawh a inhnît ve hlawp hlawp mai.

Tap tuau chungin, ‘Joey, i thiannu saw! Thil sual lian tak kan lo ti ta si a . . . min ngaidam ang che aw . . . Kan hun lai ang tùrah thil hi kan lo ngai a tin ni,’ a ti a nih chu! A thu sawi awmzia chu ka hre thiam lo hle mai.

Nichina ICU-a ka luh hma khán, mask vuah chung pawha ka hai theih tawh loh, Cleo ka pan lai takin Nu Sangi hian min ko a nih kha. ‘Joey. Lo kal rawh. I thiannu chu va hmu hmasa phawt la . . .’ min ti a. “Ka thiannu mai a ni em ni?” ti rilru chungin Cleo dinna ka thlen dáwn têpah ka inher a; ICU pindan lam ka pan ta zâwk kha a ni a.

Weekend leh College week-a weed nèna weak thìn kha

Nu Sangi nèna inkuah chunga kan tah dun hnu chuan,  damdawi in tual lama tei harh ka duh thu ka hrilh a. ICU tual ka chhuahsan dáwn lai chuan ka hawi kual thuak a—mi pakhat zawng ru chungin. Ka mi zawn erawh ka hmu lo!

Dawdawi in gate piah deuha dàwr lam chu ka pan a. Mei zu ngai miah loin Goldflake ka’n lam chu le! A tanna tùr ka la díl zui. Dàwr kawtah chuan ngawi renga ding chungin mei chu ka zu ve hlat hlat a ni.

Ka ngaihtuahna chu mi pakhat tä a ni—hmeichhe pakhat tä. Ka beisei ngam loh Becca chuan ka rilru leh ka ngaihtuahna zawng zawng chu a nei zo vek mai. Thil tam tak ka ngaihtuah a ... 

Hmänah khán, zú-ah a buai hman thelh a nih kha—thelh lo phei ila chuan ... tihte ka ngaihtuah lêt a. Mahse, simtír tùra ka thil tih erawh a tlém hle si. Chuti záwnga ngaihtuah pawh chu chapothlâk ka ti!

‘Engati nge Thawhtanni tûk hian i perfume rim hi a tak bîk ziah a,’ ka tih fiam lai te kha ka ngaihtuah lêt. Weekend-a a weak ziah chhan te kha nui awr awr chungin min hrilh thìn a nih kha.
 

Tum khat chu, College week kan hman laiin tlai lam, roll call zawhah kan häw a. Häw tihah, kan thianpa Muanawma car-in RV-ah kan kal a ni zâwk. Muanawma nèn a sen chi lane-ah Blenders Pride kan lam a. Anni a thiannu Awmpuii nèn week chhúng daih tùr weed an lam thung. Kalkawngah pot (weed/ganja) chu an pet páwt páwt a. Keini’n kan neih kan khiat ve bawk a.

Zàn thleng Muanawma te inah zú kan in ho leh vek a. Hàw pawh ka häw thei lo. Muanawma nuin ka nu a phone hlauh. Ka him hlauh. Kha kha ka zu in tàwpna a ni ta reng mai, hei. Zú ka in tawh loh hnuah pawh Becca chuan, a thiannu pakhat, kan rual ú deuh, MA zir lai nèna weekend-a weed an weak-pui thin dàn te pawh min hrilh tawh.

Khâng hun lai kha kan college kal tan tirh lai, sikul uniform hlîpa zalènna ram kan dai tan lai a ni daih tawh a. “Engati nge tùna taka khâng thil khân Becca nun leh a taksa a rùna a tih chhiat tâk si le?” tihte ka ngaihtuah neuh neuh a; ka na thar leh a ni. Hmânni lawka ka nat dàn nèn kha chuan a inang chuang miah lo.

Joey, häw ila . . .
‘Joey, kha coffee.’
Ka va phu chiang tak!

Tú âw nge ka hria—he lai hmuna ka hriat duh loh ber âw a ni. A âw atang kher lo paw’n a rim tui inchulh atang paw’n amah chu ka hre chat thei tawh.

‘Cleo!’ a ring that a ni ang, ka dinna síra mi dang lo dingte pawh chu inthurual ang hrimin an rawn hawi phei rual thap! ‘Eng nge hetah i rawn tih ve a?’

Cleo chuan ngawi rengin a coffee chu a sip leh zeuh zeuh ringawt a. Min chhàn a tum lo. A hma banga lianpuia “Topcem Cement” tih inziak chu ngawi rengin a thlír reng ringawt!

T-shirt dum, a hmaa “Led Zeppelin” tih inziak a ha. Jeans kekawr päwl hain Nike snickers dum a bun bawk. Nalh chu a nalh; mahse, ka tán a máwi zo rih lo—tùnah tak hi chuan! A mask a phelh tawh a; paper cup-a a coffee ken lai chu ngawi rengin min pe a. Ka la ve mai a.

Cleo—a pian hlima “Cleopatra” chu, a hmel that dàn a la ngai reng a. A la chuai lo a, a la vuai hek lo. Mahse, he thinlung hian hmangaih hmasa a nei a—a bànsan zet tawh kha. A hmun ruak luah tùrin, Cleo a chhar a ni mai a. Mahse, vawiinah kher kher hi chuan, la chuai lo Cleo chu, chul ta ruih hian ka hria!

‘Joey, häw ila. Zànah kan kal tha leh zâwk dáwn nia.’

Ta deuh deuh chuan a! Ka zawhna pawh min chháng loa chutia hàwpuia min sáwm chu ka haw hle.

Ka zawhna chu a hre lo em maw ni le, ti dáwn ila, kan piaha mite paw’n an hre phâk vek si a.

‘Engah maw? Eng vàngin? Eng nge hetah hian i tih ve reng reng ka tih che chu? Eng nge thil awmzia hi, Hmangaihzel? Tute nge maw in nih le!?’ ka ti ta phawng phawng mai! Ka va duh lo!

‘Aw ... hriat duh i neih avàng chuan aläwm maw le . . . Kan inah chaw kan ei ang a, engkim i hre thiam vek ang. Heta sawi vek chi a ni lo,’ Cleo chuan a ti ta a.

‘Cleo, min hre thiam rawh aw … ka hamhaih êm atin ni. Ka in-control zo lo palh a nih kha.’

‘Ka hriat thiam vàng che aläwm hàwpuia ka sàwm che. Min hriat hma hauh khán ka hre tawh che—chiang takin! Vawiina i awm dàn tùr thleng hian ka hre lâwk vek,’ a ti ta mai a.

Damdawi in piah deuha taxi dinna lam chu kan pan a... 

Inpuanna

Cleo nèn chuan ngawi rengin taxi seat hnungah chuan kan thu dùn a. Sawi tùr kan neihte chu taxi pu hriat ve kan hlauh vàng pawh a ni ber lo ang, sawi tùr ber kan hriat loh vàngte pawh a ni zâwk maithei, thui fé kan tlàn hnu pawh chuan kan la ngawi dùn zêl a. A nih loh vëka leh, sawi tùr ni lo, zawh tùr ka ngah lutuk chuan ka thluak a ti buai zoa, min ti dang­âwk zo vek a ni tal ang.

Tin, kan hamhaih dun êm vàng te pawh a ni thei bawk. Chu chu a nih loh pawhin, hlauthäwng–mak ti–a ngaihna hre lo–thinrim–mahni inhua—chûng zawng zawng vànga rilru buai nuaia kan awm ve ve vàngte pawh a ni maithei bawk. Chu aia tam mah chhan dang a la awm thei bawk ang. Ngawi rengin kan thu dùn tlawk tlawk ringawt mai a ni.

Cleo te in kan thlen chuan kawngka a lo inkalh a. ‘E he! Khaw’nge i chhúngte?’ ka ti ringawt.

Min chháng lo. Ngawi rengin a jeans kekawr ipte a zen. Chabi a rawn phawrh.

Min páwngsual êm lo’ng chu maw, ti rilru chungin kan inzui lût ta a nih chu—an inah chuan—nge, a in luah ni zâwkah chuan. Kan pahnih chauh chuan.

Kan thu fel a. A thaw hluai a. A tho a. Fridge atangin juice a rawn la a. No-ah a thli a.

Ngawi reng tùra he lai hmun pan hi ka ni lo tih ka inhria. Ngawih reng chu ka duh lo. Sawi tùr leh tih tùr ang ang chu sawia tih vat vat mai chu ka duh a ni. ‘Engati nge min lo zui zêl ka tih chu . . . ?’

Cleo chu a ngawi tlat. Ka ding hluai a. ‘Becca nèn hian engtin nge in inhriat a, Hmangaihzel?’ ka ti leh.

Coffee—ni lo, juice sip zeuh pahin, ‘Joey, thu la. Hahdam teh. Ka hrilh ang che—kan thu tiam bawh chhiat i remtih chuan,’ a ti a.

Ka sírah pawh a thu lo. Chiang taka ka hmuh theih tùrin—nge, chiang taka min hmuh theihna tùr zâwkin, ka epah tak a thu a. Kei pawh chu ka thu ve leh mai a.

‘Thu tiam, thu tiam! Chûng sawina hun em ni?’ Duh aiin ka aw ki ka bei sáng leh.

‘Nun hlui—hun kal tawh sawi chhuah i remti em? I remtih loh chuan eng mah sawi tùr ka nei lo,’ Kei aiin a aw ki a sáng zâwk! A ngawi zui hmak bawk.

‘Remti e. Sawi la . . . ’

Chutih lai tak chuan Cleo-i phone a rawn rî a. ‘Nu Sangi,’ a ti zauh a; a ‘Hello’ zui.

‘Aw Nu Sang,’ a ngawi vang vang a. ‘Tünah maw!?’ . . . A ngawi leh det. ‘Aw le, aw le. Kan lo phei nghâl,’ tih leh a iptë-a phone dah a rual a. 

Thawh hluai pahin, ‘Kan lêt nghâl a ngai. Recbek-i a tha lo. A kal hnai a ni ang,’ a ti zui a. . .