ICU pindana mi dam pahnih

ICU kan va thlen chuan Becca chu a lo käng leh hlek tawh a. Nichin khán, tú ma hnênah kan hàw tùr thu kan lo hrilh pek lo a! Cleo hnên atanga thu rûk inthup hriat ka duh thut thut vàng a ni ber ang chu. Ni e, kan kal hnu lawk khán Becca Bp a lo hniam vak a; an lo buai deuh laih a lo ni.

Pindan chhúngah chuan Cleo nèn chuan va lût ve a. Becca kut chu ka vuan leh tlat a. Engtia rei nge hetiang hian a kut hi a lum reng dáwn tih rëng ka hre si lo.

A hre dáwn chuang lo tih a hriat vàng ni maw, Cleo chuan, ‘Rebeck hei, Joey nèn kan lo kal a . . . ani paw’n a hmangaih che a nia aw . . .’ a ti!

‘Becca . . . Becca. I kiangah ka awm reng a nia aw. Ka . . .’ ka sawi zo lo! Becca chuan ka thu sawi chu hria angin a awm bawk si lo! A va manganthlâk tak!

Rei awm a rem lo. Nikhaw hre loa mu reng, a nunna la chelhtu pawh Pathian leh kháwl (ventilator) chauh ni tawh, Becca chu kan chhuahsan leh ta a ni. 

Engati nge Cleo-i nèn?

Pindan atanga kan chhuah rual chuan Cleo chu dàwra ei tùr ngaihtuah tumin in hnuai lamah min chhuksan nghâl a a. Min hmuh vêleh Nu Sangi chuan min lo hui vak a. A kianga a bag dah chu pawmin thutna min lo kian sawk sawk a.

‘Joey, ka va’n läwm ve aw . . . in rawn lêt leh a. I buai àwm nèn. Mahse, thla i ti muang si a,’ tiin lawm thu min lo hrilh luam a.

‘A . . . Nu Sang, ka tih tùr aläwm.’

‘A nih leh, engtin nge Cleo-i nèn in inzui teh tlat a?’

Mak ka va ti tak! Cleo leh Becca te inlaichìnna rëng ka la hre si lo. “Cleo ka tawn tirha ka thil rinhlelh kha a dik ngei dáwn e,” ka ti rilru a. 

‘A . . . véng khatah kan awm a; KtP . . . tih vêl . . . group khatah kan awmho bawk. ’Bâkah, ui kan kai dùn thìn. . .’ te ka ti bah nuai mai.

‘Zú leh thil dang a nghei hlen ta hi ka läwm a nia aw . . . Lo inkàwm zêl teh un,’ a ti ta chat mai! Ka phu zawk—ka ti lang chhuak lo erawh ka läwm.

‘Nichina i rawn phone lai pawh khán an ina thingpui kan in lai tak a nia,’ ka ti a, ‘kan la inkàwm rei lo a. Ka la hre chiang lutuk lo. A zu in tih vêl pawh . . .’

‘Thil hlui hi sawi sawi a tül lo rëng a ni,’ a ti mai a.

Chutiang chuan “ti mai” tiin sawi mah ila, a thu sawi chu, “mai” tia sawi chi a ni lo. Thu thui deuh leh sei tak a sawi a ni. Thil tam tak hriat ngai ka nei tih pawh ka inhriat chhuah belh bawk.

Cleo rawn lêt hnu chuan thingpui kan in a. Dárkár khat tha kan awm hnu chuan kan duh lo chung Moses-a’n hàwa hahchàwl tùrin min ngen tlat a. Min thlah tùrin an driver a ko a. Kan hàwsan ve ta mai a.

Hàw kawngah chuan Cleo nèn chuan kan inbe lo leh a. Inhnaih taka thute inkár chu hmun zím të mah ni se, kan thinlung leh kan rilru put erawh, New Serchhip leh New York anga inhlat a nih ka ring hial!

Kan ngawi dùn reng a. Ngawi rengin Cleo chu an in zâwnah a chhuk a. Kei, kan in zâwn thleng Becca te driver chuan car-in min thlah ve thung a.

Kan inngaizáwng hman têp a!

Ni thum a liam ta. Class pawh ka chàwl tawp. Becca chhúngte chuan “thil engkim” an hriat thiam tawh avàngin inthiam lohna hlïrin an khat a ni ber. An kianga awm hla tùrin min phût tlat lenghâl!

Cleo paw’n a thawhna sikulah ai-kal a la (ru) hmiah bawk. Kan ui ve vete khân min suih zawm tawh miau a. Kan chàn  ve ve hnu leh, hetia Becca a awm tâk avàng te hian a niang, suih nghehin kan awm zual sawt ni ten ka inhre hial. Tin, Cleo hi Becca hmangaihtu a nihzia Becca chhúngte paw’n an hre tawh . . . a ni ang. Keimah ber hian ka hriat duh “thil engkim” ka la hre ve lo mai pawh a.

Zan khat chu—a zan ngàna a nih chu—ICU pindan páwn reh ruihah chuan Cleo-i nèn kan pahnih chauhin kan thu dùn a . . . ti ila, Becca chhúngte kan mut hilh hmasaktír a.

‘Rebeck-i nèn hian kan inngaizáwng hman têp a . . .’ muang fán ban charhin Cleo chuan a ti. 

‘Eng a!? Engtin maw? Eng . . . maw i sawi!?’

Ka tho hluai a. Ka aw kî pawh ka sàn leh hle.

‘Min duh êm a. Ka khap tlat a . . . min duh kha! Ka sawi awmzia chu, min duh lo tùrin ka ngèn tlat a nih chu.’

Ka hmai ka hup a. Ka khûp sìin ka kün a.

‘Khai à le!’

Cleo chuan, ‘Mipa inchei anga inchei kha nuam ti a. Hmeichhe thuam ka ha ngai lo,’ a ti leh a.

‘Eng nge thil awmzia?’ hmai hup chunga ka tih chu a hre thei tho a ni ang, ‘MA ka zir lai . . . nangnin BA in zir lai khán,’ a ti zui a, ‘khatih lai khán weed leh zú ka bei nasa ve a. Tin, mipa inchei hlîrin ka inchei thìn . . . ah . . . college ka kal lai atang tawh khán a ni zâwk ang chu,’ a ti leh a.

‘Chuan, engtin … ?’

‘Ka ngaihzàwn ve duh tlat loh avàng khán inngaizáwng ta loin thian kan ni hlen ta a. I chanchin hi a sawi nasa thìn. MA ka zawh hnu khán kan khuaah kum khat ka han awm a. Rilru ka siam a. “Mipa ka ni lo—ka rilru pawh a pà hek lo,”  ka inti a. Mipa awm anga awm chu dik lo ka ti a. Ka sim a. Tüna ka thawhna sikula ka thawh tirh hian ani chuan zu leh damdawi, heroin leh pills thlengin a khawih vek tawh. A chhan bera chu, keimah min hlat theih nána a chhúngten pasal neihtír an tum vàng a ni.’

‘Tùna mi hi? Nangmah a hlat theih nán a chhúngten—’

‘Ni e. Nikum kum tàwp khán in léng a nei daih tawh aläwm,’ a ti ta a. Ka rilru tê tê chuan, “A niang chu … password—“1303” pawh, kum tìr January thla tìra kan siam dun a nih kha! Ni lo, ama siam!” ka ti a. Ka sawi chhuak lëm lo.

‘Mahse, a chhúngte chuan Rebcek-i hruai sualtuah min ngai tlat a—a tìr kha chuan. Mahse, engkim Nu Sangi ten an hriat hnu hian an inchhïr êm êm a. An inthiam thei lo a. An khawngaihthlâk zâwk,’ Cleo chuan a ti ta a.

‘A va buaithlâk! ’Nih leh, engati nge keimah min rawn pan tùra i tih mai loh?’ ka ti a. Ka rilruah, Nu Sangi thu sawi, ‘Kan hun lai ang tùrah thil hi—’ a tih kha a lo lang a.

‘A duh khawp asin! Mahse, hmuh tlâk leh duh tlâk niin a inhre tawh lo a ni—a ruihhlo tih nasat avàngin. I phone number pawh min pe. Ka rawn be hman lo hlauh che a. A chhan chu, i number min pêk zàn là lâ khán,  “Lo be miah suh ang che! Mahni inching fel thei rual ka nih ve tawh hi. Ka duh hunah chuan ka sawi tlang ve mai ang,” min ti leh si a.

‘Kei chuan, nangmah ngaizáwng tùr khán ka nawr sek thìn. A chhan chu, ka sawi tawp mai ang—ka lak atanga a chhuah theih nán, nangmah hi ka duhsakpui tawp a nih chu maw . . . A chhuak thei a nih ngat chuan, ruih hlo pawh hi a kalsan nghâl ka ring,’ Cleo chuan min en kal chungin, zàmna chhe të mah nei loin a ti ta a.

‘Joey, mahni indem duh suh. Becca-i i block hnu khán awm ngaihna a hre lo a. “Tlai” a inti ve a nia aw . . .  I chanchin hriat a duh avàngin ni tin min rawn call thìn asin. I nunah hian Lenny emaw, Leo emaw vànga rawn lang hlawl ka ni lo. Becca-i khân i khua a hara i nat a hlauh êm avànga—’

A sawi zo lo. ICU pindan a inhawng a. Daktrawr leh nurse pakhat an lo inzui chhuak.

Thlànmual panpuitu tùr—thlànmual kawnga inchharte Cleo nèna kan inchharna hmun kha thlànmual kawng a nih kha. Tüna engkim min hrilhna hmun pawh hi, mi tam tak thlànmual pan tùrten he leia an zin kawng an zawh tàwp na hmun a ni ve chiah mai! He ICU tual—thihna leh natna rim nam rum rumna hmunah hian, nun thar, hmangaihna thar rim leh, nun hlui vànga hliam la dam kim lo rim chu ka hnim chhâwk chàwl lo a nih hi!

Sana ka en zawk a. Peih lo leh hreh hmèl zeta dár hnih a pèl fel chiah—daktawrin, ‘Rebecca chhûngte in awm em?’ a rawn tih hun chiah chu.

Hmm . . . ka beisena neih chhun chuan, kin ní a hmu ta! Thlànmuala inchharte chuan, kan hmangaih leh kan duhsak êm êm, Rebecca Lalhriatrengi chu—amah avànga hmangaihna zár thara chuang kai têp tawhte hian—thlànmual kawng kan chhuipui a ngai ngei dáwn e!

Inthlahna

Tah ka tum a. Ka tap thei lo. Becca te inah chuan Becca … ni lo, Becca ruang chu kan phur hàw a. A lu kan men a.

A tûkah chuan, a rûka min lo hmangaih rengtu; kei paw’na ka hmangaih reng thin chu—hmangaihnain pár a chhuan hma hauhin, kan vui liam ta a ni . . .

Hàw kan tum thu Moses-a kan hrilh chuan a scooty min hmantír a. Cleo nèn chuan kan inphur hàw a.

Kalkawngah chuan nizàn lama a la sawi loh, “engkim ti famkimtu thu” chu, ka hnunga chuang Cleo chuan a sawi chhunzawm melh melh a. Sawi tùr ka neih ve loh avàng leh, inchhìrna hlïra ka khah avàngin, ngawi tlawk tlawkin Cleo thu sawi chu ka ngaithla kar a . . 

Zan khatna nge—eng zàn nge . . . ?

Class ka zawm leh tawh a; Cleo paw’n. A khát mawi tâwkin Becca te in lam chu ka tlawh äwl lo. Kár khat a liam hnu, ráltute kiam hnuah Cleo chuan pangngai taka va ràl ve a rawt a. tha ka tihpui a.

Chumi zàn chu Clo-i nèna kan zan khatna a ni—han ti ngawt ila, a engti záwnga zan khatna nge a nih ang le?

A tawi záwngin, Becca thlalâk, frame-a kan siam chu kan pe a. Dárkár khat dáwn kan awm hnuah hàw zai kan rél. An driver chuan min thlah leh a. Cleo te kawtah a ding. Kei pawh chu ka chhuk ve nghâl nulh!

Driver liam hnu, a in luah pana kan inzui lai chuan, Cleo chuan min rawn leh hawi a.

‘Eng nge? I hàw nghâl dáwn na nge? Nge, hetah—’ 

‘Ka hre lo le,’ ti chungin ka lamah ka pawt vak a. Kan inhnaih khawp a—thâw kan inpe tawn a ni ber e!

“Becca nge, Leo nge Cleo?” tia zawhna ka lo inzawh reng thin chu a tàwp ta a. Ni e, thawnthu hnuhnung zâwk chu a intan dáwn ta miau si a . . .

    —A tàwp ta—