Kan bul tanna chu màwlmang leh holam tak a ni—bual inah a ni, pheikhawk siama bul kan tan ve mai ni! Mahse, vawiinah chuan kan thil siamin khawvêl a ngam ta! Thil ropui tak tak kan hlen chhuak a, kan tum ram hlen chhuah tumin nasa takin kan bei bawk. A tha ber hlen tùra keimahnia a tha ber chhuah thinte kan ni a, hmá sâwn lam panin kan thang a, chutih rual chuan kan hmabâk kan thlìr thulh ngai chuang lo. A ni, kan bul tanna hre reng chungin hma lam kan thlír thin. Hei hi kan thawnthu chu a ni…’ tiin vawiina “Three Stripes” tia thalaitena kan hriat vek, sports company lian Adidas chuan adidas group website-ah an ziak kuau mai.

Insûkna hmun atanga su tan chu!
A chunga an website-a an ziah kan tàr lan ang khian Germany-a khaw te tak tê, Herzogenaurach, Bavaria-ah infiamna thawmhnaw siamtu lian Adidas thawnthu hi a intan a. Adolf Adi Dassler-a (Adidas hming put chhan) chuan Indopui I-na zawh hnu, kum 1924 khán a nu choká-a a insûkna pindanah, “Gebrüder Dassler Schuhfabrik” tia inziakin Adidas company tia kan hriat bul hi a tan a. A unaupa Rudolf Dassler paw’n tanpuiin a zawm ve nghal thuai a. An tum ber chu infiam mite bun tùr pheikhawk tha siamsak a ni tawp mai. Kum li hnu (1928)-ah an thuam siam chu Lina Radke chuan Amsterdam-a Olympic Games-ah gold medal a lâkpui ta mai a. Chu chu Adolf Dassler-a hlawhtlinna hmasa ber chu a ni. 

Kum 1936-ah Adi Dassler chuan US sprinter, Jesse Owens chu Summer Olympics-a a pheikhawk siam bun tùrin a thlêm thlu thei hlauh. Owens chuan gold medal pali lai a awrh chhuak ta si! Chuta tang chuan Dassler-a te pheikhawk siam chuan khawvêl infiam mi làrte leh an trainer-te ngaihven a hlawh chho ta a. Chutih rualin Adolf Dassler chuan infiam mite a tìtìpui keuh keuh peih a, an hnên atanga thu ràwn lâk a hreh ngai lo a, an bun duh ang záwng siamsak a hnial ngai lo. Indopui II-na a chhuah hma hauh paw’n Dasslers chuan kum tin pheikhawk bun nuai hnih a hralh tling ta ziah mai.
Kum 1933 May thlaah Adolf leh Rudolf Dassler te chuan Hitler-a páwl, Nazi Party (NSDAP) an zawm a. Indopui II lai paw’n German sipaite tán pheikhawk bun tùr tha an siam chhunzawm zêl nachungin indopui chuan a tih tàwpsak a tûl ta nge nge a.

Adidas vs Puma
Sumdàwnna thila unau ngei ngei pawh inhmuh thiam loh hi a mawh lo ang! Adolf Adi leh Rudolf Dassler te chu indopui pahnihna a zawh hma thleng an thawk dùn a. Chutih rual chuan, kawng hrang hranga an inhmuh thiam loh avàngin kum 1947-ah an inthen ta a. Hemi kum vêk, August 18-ah Adolf Adi Dassler chuan “Adidas AG” tiin a company hming chu a register a; a hnu lawkah a unaupa Rudolf paw’n firm thar “Ruda” (Rudolf Dassler atanga lâk) a din ve a—vawiina “Puma” ni ta hi a ni.

Sawi tâk angin unau ngei ngawi pawh sumdàwnna thilah chuan a lo ‘inhmuh Sakhì’ theih viau a ni ang; an thih thlengin an unau hian an inrem leh tawh ngai lo! Inrem ahnêkin an inelin an iner reng a. An khaw mite chuan Adidas chu “All Day I Dream About Sports” tih lam tawi ang záwngin an theh lãr ta chiam mai a. Chutih rualin Ruda lam pawh an ngawi mai mai bîk lo—an khuaa infiam mite ti phûrin a thlâwnin an pheikhawk an buntír ve zêl bawk a.

An khua, Herzogenaurach-ah hian football team pahnih, inhal tak an awm a—ASV Herzogenaurach club leh 1 FC Herzogenaurach te an ni. ASV Herzogenaurach lam chu Adidas hian an pheikhawk bun tùr a tumsak laiin 1 FC Herzogenaurach team chu Puma lam chan an ni ve thung. Khèlmualah mai an inhal lo a, an pheikhawk bunah thleng an inhua! Sawi tawh angin an unau company ve vete hi vawi te khat mah an inrem leh ngai ta lo! Kum 1974 October, 27-a boral ta Rudolf leh October 1978 September 6-a boral Adolf Adi Dassler-a te hi an sumdàwnna lamah inhal hle mah se, thlàn khatah an ruang chu zalh an ni thung. Khi lamah inrem tak ang maw?

Kum 1948 khán Indopui World War II hnu lama football inkhèl lian hmasa ber a awm a. Chumi tum chuan West German national football team-a khèl player tam zâwk chuan Puma boot an bun a; indopui hnua West Germany tána goal khungtu hmasa ber, Herbert Burdenski ngei paw’n a bun. Kum li hnu, 1952 Summer Olympics-ah 1500 metres runner Josy Barthel paw’n Puma pheikhawk bun chungin Helsinki, Finland-ah a Olympic gold medal hmasa ber a la nghe nghe. Puma lam chu an inti thei viau.

Kum 1960 Summer Olympics-ah Puma chuan German tlãn chak, Armin Hary chu 100 metre intlànsiak final a tlàn dáwnin Puma lam chuan sum nèn an thlèm a. Mahse, a hmain Adidas siam pheikhawk a lo bun tawh thìn si a. Chu chu remchángah là-in Adidas hotupa Adolf Dassler hnênah chuan pawisa a díl ve ta chat mai. Mahse, Adolf Dassler chuan a remti tlat si lo. Hary chu Puma bun chungin final chu a tlãn ta a; a champion ta roh si! Mahse, medals ceremony-ah chuan Dassler te unau mak tih tùr khawpin Hary chuan Adidas leh Puma boot hrui suih zawmin a khai ta vá vá mai! Hetia Hary-a’n a tihna chhan hi company pahnih atanga sum a beisei vàng a ni ber. Adi-a thin a ti rimin sum a pe lo chiang asin!

Whiskey úm hnih man logo thar!
Kum 1952 Summer Olympics zawh rual khán Adidas chuan Finnish athletic pheikhawk brand pakhat, “Karhu Sports” hnên atangin vawiin thlenga an hman zui tâk, thliar thuma thliar, “3-Stripe logo” hi an lei a. A man maw? Whiskey úm hnih!  

A hnu daih, kum 1971-ah “Trefoil logo” (hnah lem ang deuh) chu an duang (design) ta chauh a. A kum leh 1972 Summer Olympics, Munich khawpuia nghah a nih dáwn khán an tláng zarh ta a ni. He “Trefoil” hian, Adidas thil siam chhuah, hmãn leh nakin (past and future) a entír. Tin, he Trefoil logo hi rawng dum leh vár emaw rawng pãwl emaw chauha chei thin a ni—rawng dangin an chei ngai lo! Vawiina “Adidas Originals” tia an rawn ‘koh thar leh’ logo hi kum 1997 thleng an hmang.

Kum 1997 khán vawiina an logo hman lai—rìn ngíl pathum, “Three bars” (Mountain logo an tih bawk) hi an hmang tan a. A duangtu chu, Creative Director Peter Moore a ni. He logo-ah hi chuan rawng pãwl bànin rawng dum leh vár chauh an hmang ta.

Vawiinah chuan “Trefoil logo” hi lifestyle leh casual wear thawmhnaw lamah an hmang ber tawh a; “three bars/mountain logo” hi infiamna lam ngau ngaua an hman a ni ta. Kum 2002 atangin “Neo-Circle logo” an ti chhuak leh a. Hei hi rìn bial dum chhúnga tlar thuma inthai ang hi a ni. He logo hi infiamna páwn lam thil—incheina lam (streetwear & fashion) atán an hmang deuh bîk a ni.

Sawi dáwn chuan sawi tùr a tam a; duh tâwk mai ila—company dang ngainatu leh ha thinten min lo thîk palh reu reu ang e!