Páwl nga kan zir lai nge páwl ruk kan zir lai zâwk ka chiang ta lo—rock music-in Mizo thalaite min chiah hneh êm êm hun lai kha a ni—(keini chu kan la naupang deuha — eh! J :) Rock band-ho kha ngaih sàn namén lo khán kan ngai sáng thìn a nih kha!

Rock band poster leh rock t-shirt

Kan khatih ve lai khán, saw lai Dàwrpui pheia Buangthanga & Sons dàwr kawt vêlah sáwn rock band poster hlai pui pui hi an zuar thìn a. Guns N’ Roses (G N’ R) mai bâkah, Bon Jovi, Skid Row, Poison, Metallica te leh band dang dang poster an lo khai tlêp tuar thìn. Kal pelh harsa kan va’n ti thìn tak! 

A cháng chuan a chung berah (G N’ R) poster, band member ding tlar thap lai kha an dah fo a. An hming kan koh thin dan angin—“Ekgel-a” (Axl Rose), bandana-a a lu táwna a ding lai te; a kianga Silashi-a (Slash), cigarette pet chunga a ding àwn taih lai te; “Easy”-a (Izzy Stradlin) te, “Draft”-a (Duff Mc Kagan) te leh an drummer, “Steven Stapler”-a (Steven Adler) te ding tlar thap lai thlalâk te kha, mit tla lék loa thlír chung leh, awh luat avànga chilthli tla lo chauh chungin kan thlír vawng vawng thìn!

Mahse, keini páwl nga emaw lek zirlai, ni khata Rs 5 pai thìn tán kha chuan “awh” mai bâk kha “chan” kan nei si lo! Chhùnah Rs 3-a chow satui leih hmanga inhnawh puar ve a ngai a; tlai bànah Vaipa mix leina tùr Rs 2 khêk a ngai bawk. Kan pawisa pai a la bàn hlauh chuan “Ê-si chhang” duli man lei leh hräm kan duh bawk thìn si a! 

Khatianga pawisa mamawhna sáng tak tán kha chuan, an cassettte chu sawi loh, an thlalâk/poster awt ngawih ngawih chunga thlìr tlawk tlawk bâk kha tih theih kan nei si lo! Khâng rock band-ho poster (Rs 20 man vêl) lei tùr ni si loa a hmuna en chilha a zuartute keu kualtír vêl kha a ngam hian a ngamawm hlawl bawk si loh. Motor-in min sú ang tih hlauhawm khawpa thlìr vawng vawng kha kan chan tâwk a ni mai a! Thlìr ngawih ngawih pawh kha a zahthlâk ve tho a. Mahse, rock music khân min chiah hneh ve tlat si a ni.

Zion Street chhoa t-shirt leh thawmhnaw dang zawrhnaah khán t-shirt vár hmaa rock band thlalâk intár kha an zuar nasa hle bawk thìn. A! Khâng t-shirt te phei kha chu a awh pawh kan awt pha ngai lo a, kan melh ngam tâwk a ni. Pakhat Rs 150 man vêl a ni a—a to lutuk! “Roos sneakers” bun pha ve lo tána hâk ve ngawt chî pawh a ni lo!

Anni kha chuan a tâwt theih tàwpin “Jîn” kekawr an han hà a; a hnung ipte-ah thla bial lai ang papa “Golden Tobacco” pai chungin “Jîn” jacket—hâk that pawha ha tha ta mai loin an bánah an han báng ngei a—an t-shirt hmaa rock band thlalâk lang ngei tùrin. Chutiang chuan khawlaiah an han léng chhuak thìn kha a ni a! A hun lai na nâ nâ kha chuan Mizo zíngah anni aia “idol” kha kan nei ngai lo!

Lal Petera cassette thar 

Tum khat chu kan class-a kan thianpa, awm thei ve tak Lal Petera ú khân Purple cassette dàwra mi G N’ R album “Use Your Illusion” a lei a. A ú chuan phaiah a awmsan leh si. Amah chauha a ngaihthlâk thin thu a sawi uar hle thìn a; class-a insawi theih nán tak a hmang thìn.

Chù G N’ R album ngaihthlâk nawmzia a sawi te chu ngaihnawm kan va’n ti thìn tak! ‘Ekgel-a leh Silashi-a “in-combi-mi-nation” fuh lutuk a sawi avàngte khán amah kan ngaih sàn phah sawt thìn a. ‘An cassette ngaihthlâk paha lehkha ka zir chuan, ka zir laite hi ka thiam theih phah sawt zêl; rilru an ti chak bîk,’ te kha a ti thìn a! ‘Ekgel-a bialnu, “November Rain”-a mi model kha a nupui tak tak a nia; mahse, Ekgel-a kha a luck lutuk a, a ma daih!’ te kha a tia! A thu sawi apiang mai kha, a kip a kàwiin kan awih vek zêl!

Theih tâwp chhuahin a cassette chu hawh ka dìl a. A phal ngang si lo! Tum khat chu tih dàn ka thlâk a. Chhùn chawlhah, canteen-a ka chow ei ai ka show a. Tlaiah Vaipa mix ka show mai bâkah KC Ice ka “khilai” leh bawk. Chutah le, an inah min hruaiin a cassette chu min hawhtír ta hlauh mai le!

In thlen hlàn ka nghâkhlel lutuk chu Dàwrpui atanga kan véng, Ramthar Véng thleng tlän hlïrin ka thleng! Kalkawngah te chuan G N’ R album chu ipte-ah pawh ka ak phal lo; kawng síra miten an hmuh loh hlauin ka keng lang ang tak vâwk vâwk a. Vai chhang zuar—“E-si chhang” leh “páwp” tih vêl an zawrhna dàwr pawh chu a melh pawh ka melh peih tawh lo—chhùn leh tlaiah eng mah ei lo mah ila, ka ril a tám tlat lo!

Buaina hmasa

Ina lo awm, ka “ka-jen” (cousin), páwl kaw zirlai K’u Muana chu G N’ R album thar, “Use Your Illusion” chu ka hmuh nghâl. Kei ai mahin a läwm zâwk! A “pe-lei” (play) hma hauh chuan a lám nghâl chiam mai!—a “Hallelui!” lo chauh a ni! Kan tape neih chhun, chhúngten Thlirvêlna leh Chanchin thar ngaihthlâk nán bera an hman, National Panasonic-ah chuan a’n thun a; Ekgel-a zai chu kan ngaithla dùn ta! A thu awmzia hre hauh si lo chuan, kan mittui a tla zawih zawih thei tho nia!

Mahse, buaina kan nei ta! K’u Muana hnênah chuan Lal Peter-a’n zanin chauh cassette hawh a phal thu ka sawi. Ani chuan, ‘Eng­tin nge kan record theih ang a? Kan tape hi National Panasonic a nih hi! Record-na a chhawm loh hi! Cassette ruak i rawn hàwn rëng rëng em?’ min ti ta!

‘Hàwn nang!’

‘Ni e; i rawn hawn ka ring lo rëng a—pawisa i “khaw-tawm” thei ve thìn si a! TDK cassette ruak man pawh a to a nia, Sony cassette ruak phei chu!’

Rilru a buai zo a. G N’ R zai pawh chu kan ngaithla tui thei tawh lo! Ani lah a ngawi vung vung. Tawngtaiin Pathian a páwl emaw tih mai tùr hian mit chhíng duar duar chungin hnuai lam a bih ta ngur mai. A hnuah, ‘Hmm! Tih dàn ka hria. Ka thianpa Jimmy-a tape, “Akai deck”-a record kan díl mai dáwn nia.’ Ka rilru chuan “Yesss!” a va pe ring êm! Mahse, buaina dang a la awm—cassette ruak bawk chu!

‘A nih cassette ruak!’ ka ti chhuak chu min va melh rum tak!

Ngawi rengin ka nu cassette neih chhun, Lalchawimawii cassette chu a va phawrh. ‘Hmm … record hnan hmiah mai ang! I nu’n a ngaithla ngai vak chuang lo!’ a ti leh. Ka rilruin ka “Yesss!” leh!

Cassette record thu leh a hnua buaina

Chumi zàn chuan chaw kan ei tlém dùn ngei mai! U Jimmy-a te in lam panin kan tlàn chhuak—G N’ R cassette leh Lalchawimawii cassette keng chung chuan. Kan thleng har lo. Kan vànneih asiamin U Jimmy-a chu nula rìmin a lo léng chhuak lo hlauh!

A tape recorder, Akai deck tha mi—a lehlam lehlama cassette thunna chhawm chi chu a’n “Ons” a. Lehlamah G N’ R cassette; lehlam record hmehna awmna lamah Lalchawimawii cassette chu a thun ta. Rawng sena “Record” tih inziak chu a hmet ri ta khauh mai le!

A record chhúng zawng kan ngaithla tluan parh a. K’u Muana nèn chuan nuam hi kan ti veng veng mai! A record zo. U Jimmy-a hnêna làwm thu kan hrilh hnu chuan kan hàw ta a.

Kan National Panasonic-ah chuan Lal Peter-a cassette pawh chu kan “pe-lei” tawh lo; Lalchawimawii cassette, G N' R album kan record-na zâwk chu kan han “pe-lei” mai chu! Lal Petera chu ka ngai tawh lo chiang! Zanin là lâa a cassette ka hawhsak pawh chu pêk lêt leh nghâl ka châk hial!

A tàwpah buaina!

A tûk tlai sikul bànah pindanah homework ka ti a. Pindan atanga ka nu Vawk chaw pe zo, choka pana rawn chhoh paha a rawn zai vei rát rât chu ka hre pha—“Ka hawi vêla e, engkim mai hianin ka lung min lèn!” a rawn ti chho. Ka nu chu a lung a léng a ni ngei ang! Ka pa a awm lo bawk a, tape a “pe-lei” ngam ka ring deuh.

Chutah, Lalchawimawii cassette ngei mai chu a zawng ta! Pindan parda atangin ka bihthla. A thuhrûknaah a awm lo. Kan tape chhúnga a lo la inthun chu a hmu ta hlauh!    Phùr êm êmin Lalchawimawii zai ngaihthlâk inbeisei êm êmin a ri (volume) chu a ring thei ang bera a herh hmasak tê tê hnu chuan “Play” tih inziak chu a’n hmet ta a le!

A khawi lama, “Ka hawi vêla e, engkim mai hianin ka lung min lèn!” tih chu a zai lo chiang ê! Ring êm êm mai hian, Ekgel-a chuan, “There’s a heaven above you baby; Don’t you cry … don’t you ever cry-y-ya, Baby maybe someday… Don't you cry cry toniiiiight!… Yeah yeah yeah… aahh! Yeaaah…! Ahhh…! Yeaaah!”

A phu chiang lutuk leh hlau lutuk chu páwnah a tlân chhuak rang teh asin!