Kamchhuak

Chhun khaw ênga inrawkna

K. Lalrinchhana - Jul 03, 2021

Karimganj leh Silchar vaite tan hian Mizoram hi inthlahrung awm tak, inthlahrung hauh si loa duh tawka an sapatal theihna, an lei Eden a ni hawt e! An tan hian Mizoram tluka ram nuam hi a awm chuang dawn em ni?

British-in kum 200 chuang teh meuh India ram an awp chhung khan India ram hausakna kha nasa takin an rawk a, uchuak takin chhiah an khawn a, mi retheite chhiah tlingkhawm hmangin an in la muk a, sawrfu leh chuan tur pawh awm lo khawpin India mipui te kha an sawr fu a, a rawkin an rawk a ni ber e. Akbar-a te, Shah Jahan-a te hun laia khawvel ram ropui ni thin India ram chu kum 1947 a an chhuahsan meuh chuan khawvel ram rethei ber a lo ni ta der mai. 

Indian mipui tam tak zingah kut themthiam hmanga ei zawng, artisans te leh handicraftsmen sing tel te kha British awpna tuar nasa ber te zinga mi an ni. British awpna hnuaiah khan an thil siam chhuah (handicrafts products) te chu mi dang hnenah an hralh thei lo a, English Company hnehah chuah an hralh thei a ni. An hralhna rate pawh a leitu tur English Company te khan an bithliah sak thlap thin. An duh emaw duh lo emaw, an phal emaw phal lo emaw pawh nise, an thil siam chhuah te chu man tlawm thei ang berin sap ho chuan an lei luih sak a, hmun dangah man to takin an hralh leh thin a ni.   

Tunah keini Mizote pawh hi, muang leia kan awm hnu hian chhun êngah rawkin kan awm mek a ni mai lo maw? Kan in sa turin Karimganj vai tam tak kan chaw lut a, ILP tel loa rawn lut thei lo, kan sponsor chawp ngai Karimjang vaite hian kan rate neih sa ang hian hna min thawhsak duh miah lo. Tunah hian cement mistiriin ni khatah cheng 750 an hlawh a, helper-in cheng 450 an hlawh bawk a. Daily rate hian vai mistiri chhawr tur zawng ila, chhawr tur an awm ta mang lo.

Beam leh ban chhun atanga slab chhun leh brick rem thlengin ‘theka’ lo chuan an thawk duh ta mang lo. Construction work engkim mai hi square feet-in an chhut thlap thlap a, kan rawihate zawk hian an duh ang angin a rate an chhiar tawp mai a ni. Kan mamawhna a sang si a, daily rate angin an thawk duh bawk si lo a, in sakna turin loan kan lo la lak lawh tawh bawk si a, tlin lo inti chung chungin, to ti chung chungin, an in chhiar dan ang angin theka-in kan inchhawr ta alh alh mai a nih hi. Tha na ru tak chungin kan sponsor chawp te thuhnuaiah kan kun a, a hnam ang pawhin he thil hi chu a tlawm thlak deuh chu a ni.

Karimganj leh Silchar vaite tan hian Mizoram hi inthlahrung awm tak, inthlahrung hauh si loa duh tawka an sapatal theihna, an lei Eden a ni hawt e! An tan hian Mizoram tluka ram nuam hi a awm chuang dawn em ni? Hnam anga kan tan rual a hun ta tak zet e. Tun anga kan mi chhawrte duh dan ang zela theka system-a kan inchhawr zel dawn a nih chuan kan chhawrate sahmim hi kan tipuar lutuk dawn e.

Theka system hrim hrim hi a tha lo tihna a ni lo va. Mi thenkhat tan chuan ni tina hlawhfa zawn buai ngai loa theka-a inpek mai hi a fel thak mai a, hmanraw ngaihtuahsak bak buaina tur dang a awm vak lo. Hetih rual hian kan in theka-tirna rate inla hlei lutuk leh, vai hoin an duh duha rate an control mai hi chu a fel lo tak zet a ni. Theka-a hna kan in thawh tir dawn a nih pawhin ram pum ina kan zawm tlan theih tur rate mumal tak awm se, chumi pel chuan kan mi hausa te pawh hian chhawr lo hram se, he thil hi hnam issue ang hiala kan ngaih te pawh a tha ang.

Beam chhun a ni emaw, slab chhun a ni emaw, bang rem leh plaster pawh nise, theka rate mumal tak kan nei thei a nih chuan rate in ang rau rauah, thiam dan in ang rau rauah kan mizo pui te ngei hi in chhawr uar ila, anni pawh chhawr nahawm taka awm tum hram bawk se a tha ngawt mai. Mizo leh vai inan lohna deuh pakhat chu, vai hnathawk chuan a ruaitu a ngaichang thiam a, an duh dan a dah lal thiam a, a ngaihdan leh duh dan a sawi ve vak vak lo. A thawh chhan a hre chiang a, hlawh a hmuh phawt a neitute a hnial ve vak vak lo. Mizo hnathawk thenkhat chu a neitute ai mahin intih thu kan tum a, ngaihdan leh duh dan hrang kan nei a, kan ngaih dan leh a neitute duh dan a in kalh tum chuan kan ti tau deuh mai thin. Chhawr nahawm taka kan awm ve hi a ngai a ni.

Daily a ni emaw, theka system pawh nise, sawrkar hian rate and wages mumal tak siam se, chu chu mipuiin zawm tha ila. A zawm duh lo chu veng tin leh khaw tina tlawmngai pawl te hian en zuiin vil zui se la, reiloteah tuna an thuhnuaia min dah mek tu te hi kan thuhnuaiah kan dah let thei mai ang. Tangrual ila, sawrkar leh tlawmngai pawl te ruahmanna siam ang lo chuan tumah in chhawr duh lo ila, rei an tang hauh lo ang. Mizo te hian chhawr duh lo ngat ila, tam tak chu thir chhe zawn bak hmabak nei lo, an rama thawh tur nei chuang lo te an ni. Chhun enga uchuak taka min rawkna hi tih tawp a ngai e. 

Share now