May 31, 1911 a ni; chhùn dár 12-a pèl hret. Ireland hmâr lama khawpui lùn tak, Belfast-ah chuan khawvêlin a la hmuh ngai loh, lawng lian RMS Titanic chu Lagan lui kamah mipui hmuh theih tùrin an dintír ruau mai a. Hei hi Harland & Wolff leh White Star Line ten an lawnglian siam thar, mipui hmuh theiha an pho chhuah hmasak ber tum a ni. Hemi ní-a Titanic lawnglian thlírtu mipui hi sîng chuang an ni.

An sumdàwnna thila Europe khawmual fang zo, American sumdawng hausa, hetih hun laia khawvêla mi hausa ber zínga mi John Jacob Astor IV leh a nupui Madeleine te chu khawvêla lawng lian ber, pil thei lo tùra ngaih RMS Titanic-a New York-a lêt leh ngei an tum a. Ticket pawh mi tam berin an lâk, Third class room—pound 3/pound 8 man lek lâk a lang lo; a man to, First class room-ah rau rau pawh, first class satliah, zan khata pound 30 man lek lâk ai chuan Parlour suite, zan khata pound 875 man chu an tán a na hauh lo. Mahse, an hausakna leh sum leh pai leh an rohlute, innghah nán bera an hman chuan, an nunna a chhanhim zo dáwn lo tih an ring pha dèr mai si lo a!
Lawng ropui chu

Khawvêla mihring siamchawp thil che thei awm zawng zawng zínga a lian ber RMS Titanic (RMS hi Royal Mail Ship tihna a ni) chu British pound maktaduai 1.5 sénga sak a ni a (vawiinah chuan pound mtd. 170 aiin a tam); a sei zawng/a dung pawh lâmmual lêt hnih leh a chanve aia sei, meter 269 (ft. 882.5) niin a vãng lam chu meter 28 (ft 91.8) a ni. A meikhu chhuahna thleng chuan meter 53 (ft 170) a sáng a ni bawk a; chhãwng (deck) 10-a nei.

Kum 1909, March 31-a sak tan RMS Titanic hi kum hnih leh thla hnih chhúng sak a ni a; mi sâng thum vêlin he lawng lian hi an sa. An sak chhúngin hnathawktu mi pariatin nunna an chán a, mi 246-in hliam an tuar bawk. Lawng pumpuiah hian thîr kilhna (rivet) 3,000,000 hman a ni a; thîrchakai phur tùr ringawtin sakawr 20 lai an chhawr.

Khualzin mi 2,566 leh thawktu 981 phur leng thei tùra duan Titanic lawng chhúngah hian pindan 840 (416 – First Class, 162 – Second Class, 262 – Third Class) a awm a. Pindan luah man tláwm ber, Third Class ticket chu pound 7 atangin a intan a; First Class Suite – pound 870. vawiinah chuan Third Class ticket man hi pound 850 vêl niin First Class Suite pawh hi pound 105,000 vêl a ni tawh ang.

Nuam tàwlna lawng: First class suite hi lawng kháwl ri leh a nghawrin a tih buai phâk loh, lawng chhãwng chung lamah a awm vek a. A chhúngah hian nuamtàwlna chi tin a kim a ni ber e. Infiamna hmun chi hrang hrang–Gymnasium, Swimming pool, Squash court te awmin lu mehna dàwr te, Turkish baths, Café satliah bâkah Verandah Café leh Café Parisien thlengin, restaurant hrang hrang nèna thuam a ni. Lehkha ziak mi leh chhiar mite tán Reading and writing room a awm bawk. Lawng chhúngah hian engtik lai pawha tui thianghlim in tùr gallon 14,000 chhawp a ni a; artui tharlám pum 40,000 a pai bawk.

April 10, 1912, zíng dár 9:30 atanga 11:30-ah a phurh tùr khualzinte chu Titanic lawng ropuiah an inthiar lût mup mup a. Chhùn dár 12-ah Southhampton chuahsanin New York lam panin a zin kawng hmasa ber leh a tàwpni ni bawk chu a zawh tan ta a ni.

April 14, 1912 zanlai a la ri lo deuh. Tuipui fâwn leh thlipuiin a nuai chhiat zawh loh tùr leh tuipuia pil thei lo tùra ngaih, mi 2,222 chuanna lawng lian Titanic chu Atlantic tuifinriat khawhar tak chungah chuan lal lènin a léng muai muai a. Film lama kan hmuh angin mi thenkhat chuan, Jack leh Rose Dawson te ang khán Irish jig làm an thài mék ta ve ang. Khawsak inang lo tak takte chuan, thil pakhat an hma chhawn mék a ni tih an inhre dèr mai si lo—chhiatna chu!

Chhiatna chu!: Ni li chhúng zin kawng a zawh hnua Titanic hmaa vúr tlang lo intiang úr chu tuipui chunga chhiatna rapthlâk ber thlentu tùr a ni teh meuh mai. Chutih rual chuan, lawng enkawltute lam thiam loh a ni mah zâwk! An chuanna lawng lian leh ropui chu an ngai ropui leh lutuk a; an ring leh lutuk a; chhe thei leh tuipuia pil thei tùrah an ngai lo a—an pathìan hial tawh a!