April 14, 1912, Thawhlehni zanlai rîk nán minute 20 chiah a awm tawh tihah dárkar khata mél 23.6 (km 37.98) a chaka tleng mék Titanic chuan a hmaa vúrtlang chu a su ta buai mai le! A sut hmaa vúrtlang hmutu chu, lawnga thawk (crewman) Frederick Fleet a ni—a sut hma second 5 a la awm tihin, ‘Kan hmaah vúrtlang a awm!’ tiin a au hman tâwk!

Titanic-in chhiatna a tawh laia anmanhni hnaih bertu lawng chu Cunard Line-ho lawng lian Carpathia a ni; Titanic awmna atanga km 93-a hlaah a awm. Titanic-in chhiat a tawh atanga darkár li hnu, zíng dár 4:10-ah Titanic lawng hi a rawn thleng ve hman hrãm!

Lawngin vúrtlang a sut atanga minute 45-naah Captain Edward J Smith chuan chhanchhuahna lawngléng, nù-nau mi 28 chuanna chu Titanic atang chuan a thlâktír a. He lawngléngah hian mi 65 an leng thei. Zíng dár 2:05-ah lawngléng hnuhnung berin Titanic a mangtha ve chauh. Lawngléng thlâk an tum pahnih lah chu an la hlawhchhampui zui a!

Vúrtlang a sut rual hian minute khata ton 400-a tam vúr tui chu Titanic chhúngah a rawn fâwn lût a. Darkar hnih leh minute 40 chhúng lekin kum hnih chuang an sak, pil thei lo tùra ngaih leh duan, Titanic lawng ropui chuan, zíng lam dár 2:20-ah Atlantic tuipui a liluh fel ta! Mi 1503 lai mai chuan, minus 2 degree Celcius-a vawt tuipuiah chuan nunna an chán ta a ni!

Vúr vàng nge mihring vàng?: Titanic hian chhiatrup thila hman tùr, chhanchhuahna lawngléng (lifeboat) 16 leh chhe mai thei dinhmuna ding pali chiah zu pai a! An inringtâwk rem rem leh lutuk a ni lo maw? Lawngléng pakhatah mi 60 leng thei an nih laiin a leng zât an la phur kim lo zui! A leng zât tùr ang chu phur vek ta se, mi 1,178 chu chhan chhuah an ni ang—report-a a lan dàna mi 706 chhuah ni loin!

Vúrtlang a sut hma daih hian radio operator pahnih, Jack Phillips leh Harold Bride te chuan ralkhèl dár (warning) vawi duai lo an dawng a; an ûksak duh thak lo! April 11-ah ralkhèl dár tum ruk an dawng a; a tûk ni 12-ah tum nga, ni 13-ah tum thum dawng lehin a pil ní-in tum ruk ngawt an dawng. Mahse, engah teh vak an ngai duh tlat lo—an pathian chu pil thei tùrah ruat tlat hek lo le!

Zàn dár 10:55 a ni a; an ruala lawng lian zin ve SS Californian chuan thirhrui hmanhmawh thlâk a rawn thawn nawn leh: ‘Hei, kan ding chawt ringawt; vúrin min hual chiam mai a!’ tiin. Ngaih thutak ahnêkin, ‘Ngawi mai teh! Kan hna thawk lai min rawn ti buai teh suh!’ tiin an la chháng lêt zui kher a! An va han induh tak! A hnu lawka an chunga thil thleng chu khawvêla tuipuia chhiatna rapthlâk ber a ni ta mai si a!

Lawng captain, Edward J Smith khân vúrtlang an sut atanga minute 20 chhúng ngawt mai lawng dang hnên atanga tanpuina a au duh tlat lo bawk! Titanic pil chhan lian taka an ngaih chu lawng an khalh chak lutuk kha a ni bawk. Knots (tui-puia mél tehna) 18-a chaka khalh tùr a nih laiin knots 20.5-a chaka khalh a ni. Tin, entlang (binocular) tha leh rintlâk Titanic-ah hian hman mai tùr a awm lo! Lawng chhúng khawi maw laiah Second Officer, David Blair chuan a lo kalh hnan pek a; a chabi lah chu Southampton lama lawng viltu inthlâk kualna lamah a ti bo ngawt pek bawk a!

Tlipna: ‘Uaina hrui chat’ hla ang chauh an ni—Titanic lawng neitu, a satu, lawng viltu leh a chhúnga chuang khual zinte thil tawn hi! Sawi tâk angin an innghahna chu mihring siam chawp-ah a ni a, a siamtu mihring Siama Dintu Pathian rêng hre chang lo leh ngaihsak loin an rinna chu lawng ropui-ah an nghat a; an rin ber lah chu tuipuiah chuan a lo pil thei nameuh mai si a! First Class-a chuangte hausakna leh an thil neih hlut záwng kha, khatih laia US dollar mtd. 16.4 a tling (vawiinah chuan … !); mahse, darkar thum pawh tling loah tuipui mawng an thleng hman vek!

A tìra kan sawi, John Jacob Astor chu Titanic-a chuang zínga mi hausa ber a ni. Ani hi hetih hunlaia khawvêla mi hausa berte zínga mi niin an chhúngkaw ro khâwmtu a ni a. Hetih hunlaia a hausakna chu US dollar mtd. 87 (2021-ah dollar tld. 2.44) ang vêla chhût a ni. 

A nupui pahnihna, kum 18 mi, raipuar Madeleine Force chu Titanic-ah hian a zinpui a. A mimal chhiahhlawh leh Madeleine-i buaipuitu hmeichhe pathum an hruai tel bawk. Mahse, nei nung hle mah se, a tàwpa a chan chu Atlantic tuifinriat mawng a ni ringawt! April 22, 1912-a Jacob Astor-a ruang an hmuh khán neih a nei tawh lo—marphu takngial pawh! 

Keini pawh hi, kan sum leh pai leh kan in leh lo ropui tak takah te hian kan rinna hi i nghat mai lo ila. Min petu Pathian hre loa a thil siam kan pathìan ve mai ang tih hi i hlau hle zâwk ang u.