Thukhawchang

CONSUMERISM - NGAIHTUAH A HUN TA E

Lalthlamuana Ralte - Oct 18, 2014

CONSUMERISM - NGAIHTUAH A HUN TA E

Duh zawng apiang lei zel chakna leh thil neih belh duhna hi consumerism chu a ni mai awm e. A bikin khawpuia chengte khawsak a lo nuam chho a, sumdawnna khawvelin a chim nasa zel bawk a, awlsam taka lei theih tur thil chi hrang hrang tha tak tak a lo tam ta hle a. Sum leh pai leng vak lo tam zel leh eizawnna hna tha tak tak lo chhuak zel avang hian mipui vantlang zingah chhungkaw neinung tak tak 'middle class' an tih mai an pung zel a, inhriatpawhna (communication) a lo awlsam a, chanchin thehdarhna (media/information) lama hmasawnna a chak em em bawk a. Chutih laiin duh thlan mai tur thil chi hrang hrang lah a lo tam tial tial bawk a. Heng zawng zawng infawkkhawm hian kan inhriat loh lai hian consumerism khawvelah chak takin min hruai lut zel a lo ni. Indopui pahnihna zawh hnu atang khan khawvel hmasawnna chak takin a kal pur pur a, technology hmasawnna vang leh sumdawnna lama intlansiakna a nasat em avangin bungrua, thawmhnaw, nepnawi, ei theih thil, lirthei, khawl leh hmanraw tha tak tak, man tlawm te te a lei tur a lo chhuak tup tup a. Kawng engkima hmasawnna insehmur vel chuan globalisation a tichak tial tial bawk a. Chutianga sumdawnna leh globalisation tang dun zar chu keini India hmarchhak kilkhawra chengte pawh hian kum rei vak lo atang khan kan zo ve ta mek a ni. Tunhma chuan thil lei turah duhthlan tur a nei tam lo, a inang tlang deuh put a, dawr hrang hrangah a man a inang lo deuh e tih mai a ni. Kan chi liah a inang vek a, chawhmeh kan nan badam tel leh tel tak/tel pangngai kan hmang a, kan thawmhnaw uar zawng pawh a design chu sawi loh a rawng nen lam a inang put thin. Hmawmsawm leh ei leh in lam pawh chi hrang a tam lem lo bawk. Electronic bungrua kan hmuh phakte pawh company tlemte kutchhuak a ni hlawm a, lirthei pawh chi hrang a tam lutuk lo bawk. Mahse, India sorkarin kum sawmhnih vel kal ta atanga sumdawnna leh a behbawm a han thlah zalen takah khan kan kawtkai maiah ram dang thilsiam chi hrang hrang, tlereuh, hmawmsawm, thawmhnaw, bungrua, electronics thil tam tak duhthlan tur kan lo nei ta. Sorkar laipui atangin sum tam tak a lo luang lut zel bawk a, eizawnna hna chi hrang hrang a lo pun zel avangin pawisa lengvak a lo pung nasa ve ta bawk a. A tawi zawngin heng zawng zawng infawkkhawm hian thil lei chakna leh neih ve duhna rilru (consumerism) min puttir nasa ta em em mai a ni. Sumdawngte pawhin a leitute (awlsamna tur an dap reng a, dawrkai thenkhat chuan an thil zawrhte a ba-a lak an phal hial thin. Thla tin an rulh leh tho avangin a zuartu leh a leituten an hloh lo ve ve a ni. Instalment-a an rulh leh hian a nihna takah chuan dawrkaite hian an bungrua an hralh reng tihna a ni a, a tam viau phei chuan bungrua thahnem tak hralh reng ang an ni zawk. Heng zawng zawng hi consumerism hring chhuaktu leh tichaktu a ni. Consumerism hian mihring nun nasa takin a nghawng danglam thei a, duh thlan tur thil chi hrang hrang a tam tak em avang hian rilruah awhna a lo pun phah, chu chuan rilru piansualna a thlen thei a ni. Rual awh vang hian pawisa mamawhna a san phah a, kut tling lo a sum lak luh mai hreh lohna a piang thei bawk. Mamawh vang pawh ni lo a neih ve kher duhna rilru hrim hrim pawh hi rilru piansualna chi khat a ni maithei. A chunga kan sawi tak, instalment a rulh tur ang chi pawh hi ngaihtuah chian fe ngai a ni. Khawthlang rama chengte tibuaitu lian tak pakhat chu credit crunch an tih hi a ni. Credit card an hman nasat avangin miin a bain a duh duh a lei thei a, an sawi dan phei chuan American pakhat zel khuan chawhrualin credit card-ah leiba dollar 9,000 zel an nei an ti hial. Thil lei leh hralh a awlsam a, consumerism avang hian pawisa khawl a tlem phah a, bank-ah sum dah a tlem a, chuvang chuan loan pek chhuah tur a tlem phah leh zel a ni. Chu chu hman deuh a US a credit crunch lo awm chhan kha a ni. Consumerism vanga economy tla hniam mek ni a ngaiin mi thiamten an vei hle a, BPU Investment Management, Downtown-a executive vice president, Paul Brahim chuan, "Credit crisis lo awm chhan hi thil lei awlsam vang leh thil leitute vang a ni...tuna thil pawimawh tak mai chu thil leitu (consumer) te hi insum ta se la, economy pawh a ziawm mai ang," a ti. Leibat awlsam lutuk avang hian economy chu leiba tlingkhawmah a innghat thei hial dawn a lo ni. Chutiang economy chu a derthawng khawp ang. Mi rama an harsatna hi sawi thui vak pawh a tul lo ang. Chuvangin kan ram lam hawi ta ila, consumerism a kan san tak viau avang hian sum leng vak a tam phah a. Sum leng vak tam vang hian tu tu emaw chuan an hlawkpui tih phat rual a ni lo. Mahse, kan economy hian innghahna nghet tak a nei der si lo a, kan rama pawisa lo lut ve chhun te pawh hi rei lo teah a luang chhuak leh dial thin. Hetiang hi kan dinhmun a nih avangin kan hmasawnna sawi ve thin te (kan thawmhnaw leh ei leh in bakah kan in leh lo tha ve tak takte) hi chu hmasawnna puarpawleng entirna mai mai ni pawhin a lang. Engpawh nise, consumerism khawvel atang hian kan tal chhuak thei bik tawh kher loin a rinawm a, chutihlaiin kan ngaihtuah ngun erawh a ngai khawp mai. Kan it zawng thil te hi kan mamawh tak a ni kher lo a, kan sum hmanna tam tak hi thil tul lem loah a ni fo bawk. Thawmhnaw (leh incheina) kan uar lutuk te, lirthei leh gadget kan buaipui zia te, pawisa neih vanga tul hlei lo a hman vak te hian mimal bakah ram pum tan a pawi thei a ni. Kan ram economy nghahchhan mumal nei lo tak hi tihngheh a, siamthat ve kan tum a nih chuan consumerist (thil lei vak vak chi) ni loin saver (pawisa khawl thei tak) nih theuh tum hram hram ila a tha awm e. Pawisa khawl hi hmasawnna hnathawhna (capital formation) atana thil pawimawh tak niin economist-te chuan an sawi a. Chuvangin, hmuh apiang leh duh apiang lei tawp zel leh bat huai em em ringawt ai chuan a theih anga tam inkhawl tum zawk ila chhungkua leh ram pawhin kan thatpui zawk ngei ang.
Share now