Zawhna: Tun lai hri leng, Covid-19 chungchangah hian engati nge a tihdamna damdawi emaw, a invenna lam emaw hi an hmuh chhuah mai theih loh le? Inkai a awl riau mai sia, keini upa lam tan phei chuan inven a ngai zual nasa an ti bawk sia, rilru a nuam lo hle mai. Pawn chhuak lova tawm reng ngawt mai hi eng chen nge kan tlin dawn a hriat si loh a, engtianga lo inbuatsaih chi nge maw ni reng reng le? Chiang zawka min hrilh theih chuan ka lawm ngawt ang.

Chhanna: Khawvelah hian natna thlen thei hrik hi a han tam laileng khawp a, chutih rual chuan hri thlen kher lo; mahse, a awmna mihring taksa chak loh remchanga laa natna thlen thei (opportunistic infection) pawh a awm nawk mai. Hrikah hian chi li angin then a ni deuh ber a, Bacteria, Fungus, Protozoal leh Virus te an ni. Heng hrik chi hrang hrang zingah hian Virus hi a tê ber pawl a ni a, an insiam danglam (mutation) chak em em bawk a ni. Covid-19 natna thlentu hrik, SARS-CoV-2 pawh hi chutianga inthlak danglam thei zinga mi chu a ni a, zirna hrang hrang an neih tawh chinah chuan chi hrang pathum (Type A, B leh C) te an awm niin mi thiamte chuan an sawi a, hei bak pawh hi la awm thei niin an sawi bawk.

Hrik thahna tur damdawi emaw, a invenna vaccine emaw siam tur chuan enchhinna chi hrang hrang neih a ngai a. Chu mai bakah mi nawlpui tana a him leh him loh enchhin tur pawh hian hun a duh hle dawn a ni. Chuvangin, tuna kan thlen chinah chuan a tihdamna damdawi emaw, invenna vaccine emaw hmuh chhuah a la ni lo a ni. Vaccine rintlak siam chhuak tur pawh hian a lo berah thla 18 emaw tal chu an mamawh niin mi thiamte chuan an sawi a ni. Engpawhnise, an hmuh chhuah thuai hi khawvelin a beisei a, a chang thup reng a ni.

Kan lo hriat tawh chinah chuan tu pawh maiin he hri leng hi kan kai thei a, a kai tawh zinga 80% lai mai hi chuan mahnia enkawl emaw, in lama awm dam theih emaw niin tun thleng chuan a lang hrih a. A bak 20% hi chu damdawi in lama enkawl ngai niin a lang a, chung zinga 5% emaw vel chuan a serious ber chi, ventilator hman ngai khawpin an awm thei niin an sawi bawk. Amaherawhchu, kum upa lam leh natna eng emaw nei lawk, a bikin zunthlum, thisen sang, lung, kal leh thin tha lo nei sa te, cancer vei leh treatment la mekte pawh an derthawng zual nia hriat a ni. Naupang zual thenkhat phei chu a natna lang chhuak lawk lova hri theh darh thei nite pawhin an sawi lehzel bawk.

Heti chung chung hian la thalai leh hrisel pangngai pawh serious symptoms nei an awm ve tho tlat mai a, naupang tê pawh he hri vanga damdawi ina enkawl ngai, a then phei chu thih phahte pawh an awm ve tho mai. Chuvangin, kan fimkhur tlan vek chu a ngai a ni tih kan pawm phawt a ngai ang. Engpawhnise, kum upa lam leh natna nei lawk kan nih chuan kan fimkhur zual chu a ngai hle tihna a ni phawt mai. Ram thenkhatah phei chuan chhungkhat theuh theuh pawh kum upa lam awm an awm chuan exposure nei lo mah se an inkhung hrang hial a ni.

Hri leng nasa a lo awm hian a darh zel loh nan Herd Immunity an tih maite pawh an sawi lang fo thin. Hemi awmzia chu hrik hi a darh zel loh nan a lo kai tawh, harsatna neih phah lem lo, hrik laka him tawh (immune) hi tam se; tichuan, a hrik hi amahin a lo reh mai thin a ni. Smallpox natna pawh hi mi tam ber vaccine hmanga ven an lo nih takah chuan vaccine la ve lo an lo awm pawhin a hrik hian kai chhawnna tur (a kalkawng) a nei tawh lo va, chuvang chuan mipui nawlpui kan lo him phah ta a ni. Chutiang chu tun Covid-19 hri lengah pawh hian mi thiam thenkhat chuan kan hneh theih dan tur ber ni angte pawhin an sawi hial tawh a ni. Mahse, herd immunity nei tur hi chuan a lo berah rama mipui cheng 60% talin a hrik hi an kai ang a, an immune (natna nei thei lo) tawh tur a ni. Chumi tur chuan a huphurhawm hle dawn a ni.

Tun atana pawimawh ber chu tihdamna damdawi leh invenna vaccine a la awm mai dawn lo nia a lan avangin a hri laka kan him kim theih nan kai lo tura invenna kan neih – Physical leh Social Distancing te, pawn chhuah apianga hmai tuamna (mask) regular taka hman te, hygiene ngaih pawimawh te, kut silfai leh tih thianghlim (hand sanitization) te, khuh/hahchhiau pawha fimkhur nachang hriat te leh, chil chhak mai mai loh te hi a pawimawh em em a. Hei ber hi mipui nawlpui hian tun atan chuan ngaih pawimawh berah i nei hrih ang u.