Mut that hi kan taksain a mamawhzia kan sawi fo tawh a, mut theihna hi Pathian malsawmna hlu tak mai ani kan ti phawt mai teh ang. Mihring hi kan kum a lo tamin stress kan ngah tial tial a, kan hnathawh dan te, kan nitin khawsak phung te hian kan zan mut hun a hril hle. TV, computer leh Mobile Phone kan hmang tam tial tial a, zan lama hnathawh ngai te kan awm fo bawk nen, zan mu tha thei lo kan pung tial tial ta a ni. Kan mut that leh that loh hi keimahni kutah a innghat lian hle mai a, mawhphurhna a tam poh leh mut kan harsat fo bawk.  Mut harsatna nei te tan hian damdawi a inenkawlna chu a awm ngei a; amaherawhchu, heng damdawi te hi hmansual nasat ber pawl an ni tlat mai. Khawvel pum ang zawnga an zir chian pawhin heng damdawi ‘sleeping pills’ tia an sawi te hi an hmansual tam ber zinga mi an ni tlat. A hmangsual tam ber te hian Drug Addict angah an inngai lova, ruihhlo dang Heroin (No.4 an ti bawk) te, Proxyvon te angin thawk na in nghei vanga chiri (withdrawal) hrehawm tak te thlen ve lem lo mahse nghei harsa tak mai an ni a, withdrawal te pawh an nei ve ngei a, taksa lam ai mahin rilru lam withdrawal a nasa thung a ni. Heng damdawi kan sawi tum te chu “Benzodiazepines - BZD” te an ni a, chung zingah chuan kan hriat lar te chu Diazepam, Alprazolam, Nitrazepam te hi an ni. Heng bakah hian Zolpidem hi addict theih loh ang deuha an sawi; mahse, addict theih tho si damdawi a ni bawk. Mizo zingah heng kan sawi tak damdawi addict hi an awm ta nual mai a, thenkhat chu mi pangngai tak tak te an ni hlawm a, an sawi hreh avangin a pui theitu an pan lawk lo va, an lo addict thuk hman viau zel. Zawhna ka dawn zingah pawh hian an awm zauh zauh a, he issue hmang hian ka rawn khaikhawm ta mai a ni. A chunga damdawi kan sawi te hi Zu vanga harsatna nei te enkawl nan te pawh an hmang fo a. Mahse doctor te monitor loh a an duh dan a lo ei ta mai mai an awm fo avangin addict chhunzawm an awm phah fo a ni. Chuvangin doctor te rawn hmasa lo leh an thurawn ang thlapa ei loh chuan a ngawlvei a hlauhawm vek a ni. A ti nasaah phei chuan rilru lam buai thlengin a thlen thei a, fimkhur a ngai hle a ni. Drug addict, a bikin heroin khawih thin te hian tunlai hian an tihpawlh nasa khawp mai a, a nuam an ti pawh a ni mai thei a; mahse, a hlauhawm zual hle a, Overdose a thlen hma bik hle a ni. Damdawi dang ang bawkin side effect nei vek an ni a, chaw ei chak lo te, kawthalo emaw ek theih loh te, ka leh hrawk ro te, memory buai, thil hre rei thei lo, zawi ngawih ngawih te a thlen thei a ni. Taksa chak lo sa, a bikin zu vanga hriselna pan te tan phei chuan a hlauhawm zual a, fimkhur a ngai hle. A hnathawh hi a lan vut vut loh avang hian mi tam takin an zuam sual fo a, an hmansual nasat chuan an dose a lo sang tial tial a, nghei thut an tum hian kaih (seizure) te hial a thlen thei a ni. Tin, damdawi addict rau rau ah mahni intihhlum duhna an nei duh ber niin an sawi. Mutpui tura damdawi an chawh a ni a, an lo hmang sual nasa a nih chuan an nghei hnu ah mut theih loh hi a rawn awm leh duh hle a, chu chu ‘Rebound Insomnia’ an ti a. Taksa lam ai mahin rilru lam hnathawh anih avangin enkawl a har duh zual a ni. Chuvangin mutna damdawi eng chi pawh hi ei mai mai loh tur a ni a, doctor chawh anih loh chuan ei loh a him ber a, kan chhungte zingah lo ei an awm anih chuan doctor chawh anih leh nih loh hriatpui ngei tum ila, doctor chawh a lo nih pawhin a ei dan tur ang thlapin an ei nge ei lo tih hriat pui a tha hle bawk. Mutna damdawi eng chi pawh kan lo addict emaw hmangsual rei a nih chuan a rang lama bansan a pawimawh hmasa ber a. A tlangpuiin ni 15-20 inkar chhung vel withdrawal harsatna a awm thin. A dose san leh san loh a zirin withdrawal hi a nain a na lo thei a, kan tarlan tak ang khian dose sang tawh an nih chuan damdawiin a in ‘detox’ te pawh a tul fo a ni. Mutna damdawi i lo hmang sual emaw addict hial tawh a nih chuan Psychiatrist Doctor te pan la, i luh thuk lutuk hmain enkawlna dawng thuai rawh.