Zawhna: Kum 42 ka ni a regular takin pum damdawi pantop lam chi hi kum 3 ka ei tawh a, kawpuar hi ka nei reng mai a, endoscopy a ka pum an en hian antral gastritis an ti a, ka kawpuar nuamlo hi a hreawm em em a, ka damdawi ei hnem (regular ) vang hian digestion ah ka buai a ni thei em? Pumna ka nei ngai lo thung si a.

Chhanna: Pum lam damdawi, a bik takin Proton Pump Inhibitors (PPI) group - Omeprazole, Esomeprazole, Pantoprazole, Rabeprazole etc hi pumpui acid insiam tam lutuk control tura damdawi an chawh thin te an ni a. Heng damdawi te hi pumpui lawng (gastritis), ulcer leh reflux problem an tih mai (pumpui acid chaw kawnga rawn put chho) atan te an chawh ber chu an ni.

Pumpui acid insiam hi kan thil ei lo thial darhtu pawimawh tak a ni a. Kan ei tur reng reng hi kan hmawm/dawlh hmain heng acid te hi an lo inbuatsaih daih tawh a, acid insiam tam leh tam loh hi kan ei leh in a zirin a dang thei bawk. Zanah kan mut hlanin heng acid insiam te pawh hi an lo chawl ve a, zing kan han thawh hian kan taksa in ei in tur a mamawh tak avangin acid te hi a lo inbuatsaih lawk thin bawk a ni. Chutiang avang chuan riltam lutuk emaw engmah ei lova zing kara rei tak awm hian acid insiam a tam duh a, chu chuan pumna a lo thlen fo thin. 

Zan rei lutuk (dar 9 hnu lam) a chaw ei te pawh hi kan pumin a digest tha tawk lo thin niin an sawi a, puar a rei duh bawk. Riltam lutuka chaw ei te pawh hi pum chuan a haw ngei bawk a; kan tih dan phung, riltam tawka chaw ei teuh pawh hian pum lam harsatna min siam hnem niin a lang. Zan meng rei thang te hian zan rei lamah thil ei an ching a, chu chuan pum acid insiam a ti buai thei bawk a, pum nuam lo, indigestion te pawh a thlen duh bik a ni.

Lifestyle mumal lo, ei leh in hunbi nei mumal lo te hian pum lam insawiselna an nei duh zual a. Hnathawhna hmuna tiffin pai te hi intihhmuh atan a tha khawp mai. Zan meng rei dawklak te pawh hian pum insawiselna an nei duh hle bawk. Kan ei leh in quality te pawh hian a hril viau bawk a, rim na chi leh thak lutuk ang te hi pum chuan a haw hle.

Kan sawi tak PPI damdawi te hi an him ang reng phian a, mahse side effect nei vek an ni a. Acid insiam tam tur vengtu damdawi an ni a, ei rei lutuk te hian pum acid insiam a buai ve thei a, chu chuan kan thil ei kan digest tha tawk lo thei a, pum nuam lo el ul te pawh neih a awl. Side effect emaw adverse effect common lem lo an neih dang te chu – ruh tliak hma (hetiang avang hian kum upa lamah chuan control a tha hle), kal tha lo te leh Magnesium tlakchham te a ni. 

PPI ei rei lutuk vanga harsatna lian tham hi a common hran lova, mahse ei rei chuan an ei loh veleh pum insawiselna an nei hma niin an sawi thung. Hunbi mumal lo leh hriat chhuah hun huna ei ngawt ang chi erawh hi chu a tha lo thung. Pumpui hnathawh pawh a ti buai ngeiin a rinawm. |ha berah chuan thla khat te ei nise, chumi hnuah thla hnih thum te han chawlh leh nise. Tin, PPI ei deuh reng ngai chi i nih chuan pumpui lam fel lo engemaw tak I nei ani thei a, endoscopy pawh ti thei la a tha hle. 

Indigestion i rawn sawi hi chu thil dang kaihhnawih vang te pawh anih hmel a, I ei leh in lam lo fimkhur ta la. Chuan zuk leh hmuam lam chi insum ngei bawk la, ei leh in hunbi felfai deuh maintain tum bawk la, chawhmeh rimna leh thak lutuk te, zan men rei loh tih te hi ngaih pawimawh a tul hle bawk ang.