April 6, 2015 khan Home Minister hoin Home department hotute an thu khawm a, Mizoram hmar tlang dung, Manipur ramri hnaih lam chu rambuai buai (Disturbed area)-a puan an rel a. Chumi tuk chuan sorkar laipui a home ministry-in Arunachal Pradesh-a district 12 huam chhung (Assam ramri bawr vela mi) chu kum khat chhung atan distubed area-ah a puang ve chiah a. Congress party hruai Arunachal Pradesh sorkarin nasa takin an dodal nghal a, an chief minister phei chuan anmahni rawn miah lo a sorkar laipuiin a lo puang tawp mai chu na takin a sawisel nghal a, sipai inlulin theihna tur dan sakei, civil mi tam takin an tawrh phahna Armed Forces (Special Powers) Act hman a ni tur hi an duh lo tak zet a ni. Chutihlaiin, pawl thenkhat leh mi tam takin an ngen chung pawhin Mizoram sorkar chuan hmarchhak lam ramri bawr vel chu disturbed area a puan a tum lui zel a, assembly session-ah chu dan chu put luh an tum mek thung. March thla tawpa hel pawlin an kah hlum police pathumte sunna hunah Chief Minister-in helho chetna lai vel hi disturbed area-ah puan a ni lo ang tih a sawi theih loh thu a sawi a, “Kan puan chuan an châk lo khawp ang,” a ti a nih kha. Kha thu kha helho vauna tawngkam a ang viau a, mipui tihchiai theihna a ni tel bawk. Home minister hian chief minister thusawi hi a bawhzui ta ni berin a lang. Chutihlaiin, sor-karin ‘disturbed area’ an lo puan tawh a thil thleng thin leh mipui tawrh nasat thinzia hre pha tan chuan a huphurhawm viau a, helai bawr vela cheng mipuite hian an huphurh lawk viau pawh hi a awm khawp mai. Sorkarin rambuai (disturbed area) a puan a tum chhan ber hi enge ni ta ang? Hel pawl vauna atana a tih a nih hmel ber a, helna tihrem/tihtawp tumna vang erawh a ni lo mai thei, dawhkan kil a buaina chinfel dan tur pawh dap theih tho a nih hmel si a. Chumi piah lamah chuan sum harsatna nasa tak a tawh mek lai hian helho beihna tur ni pah fawmin sorkar laipuiah sum dil an tum niin a lang bawk. Kar hmasa lawk (April 9) a home department lam insawi fiahnaah chuan ‘disturbed area’-a puan a nih chuan sum senso zawng zawng zinga 75% chu sorkar laipuiin a tumsak thei (reimburse thei) tih khan a hril thui viau awm e, sum chung-chang hi a chhan ber a ni hial mai thei. Thawm a awm tirh atanga sawiselna a tam em avang hian home department lam insawifiahna pawh chanchinbu lamah kan hmu thuai a. PRISM leh party thenkhatin sorkar thiltih tum chungchang hi an duh loh thu an sawi lang tawh a, Tuivai group YMA pawhin puang lo turin an ngen a, political party pakhat pawhin an duh loh thu an sawi bawk. Hmanni lawk a home minister-in all party meeting a koh pawh khan eptu lam party hrang hrang aiawhten disturbed area-a puan an duh lo vek a nih kha. Puang lo tura duhtute hian rambuai lai anga sipai inluling tur leh mipui tana harsatna chi hrang hrang thleng tur an lo huphurh lawk a ni ber a. Sorkar lam chuan disturbed area-a puan tum hi AFSPA tihnun thar lehna tur a nih loh thu leh an puang a nih pawhin, sorkar laipui puantir loin, Mizoram sorkarin a puan dan tur a ngaihtuah thu te an sawi a nih kha. Mahse, India ram state danga disturbed area-ahte chuan AFSPA hi hman tel zel a ni thin. Heng dan pahnih hi inchemchhe kawp tlat an ni. Disturbed area-ah hian sipai (leh hmun thenkhatah chuan police) thuneihna sang tak pek an ni a, hel leh hel lo thliarhran a harsat avang te, silai keng rualin dan hmanga thuneihna an neih tak avang te hian mipui an ralmuang lo thin a. Mihring dikna chanvo (Human rights) bawhchhiatna leh palzutna a thleng nasa a, helho aiin mipuiin hrehawm an ti zawk hial thin. Disturbed area-a puan a nih chuan AFSPA hi tinung thar lo mahse, helho bei tur police/sipaite thuneihna sang tak pek ngei ngei erawh a ngai dawn hrim hrim ti zawng pawhin a sawi theih ang. Vaihoin zalenna an sual lai khan British sorkarin dan siamin hmun thenkhat chu ‘disturbed area’-ah a lo puang tawh a. India independence hnuah khan Naga helho beihna atan Assam sorkarin ‘the Assam Disturbed Areas Act of 1955’ an siam a, Assam Rifles an tir lut a. Chu pawh chu duh tawk loin president-in ‘The Armed Forces (Assam and Manipur) Special Powers Ordinance 1958’ a chhuah a, chumi hnuah dan puitling ‘the Armed Forces (Assam and Manipur) special Powers Act, 1958’-ah an let leh ta a. He dan rip leh tawrhhlelhawm ber pawl hi disturbed area-a hman thin a ni. Kan hriat angin kum 1966 a MNF ten zalenna an sual khan Mizoram pawh disturbed area a puan a ni nghal a, AFSPA hmangin sipai an rawn che a, khua an hal a, mi an sawisa a, an that a, hmeichhia an pawngsual a, rapthlak takin an rawn che bawrh bawrh a nih kha. Mi tam tak chuan rambuai laia sorkar laipuiin a hman, he dan tawrhhlelhawm ‘the Armed Forces (Special Powers) Act’ hi Mizoramah hian hlih a la ni lo tih kan hre kher lo ang. MNF leh India sorkarin inremna an ziah hnu, remna leh muanna hnuaia kum 30 dawn kan awm tawh hnuah pawh he dan hi sorkar laipuiin a la hlip lo a, kan sorkar neih tawhte pawh hian hlip turin an la nawr ngai lo ni ngei tur a ni. Tlawmngai pawl leh mimal pawhin hlip turin an la nawr ngai lo a ni awm e. Chumi awmzia chu he dan hi a muhil rih a, a tul hunah kaihthawh mai theih reng a ni tihna a ni. Mizoram sorkarin ‘disturbed area’ puan chung- chang a sawi takah hian kan duh loh zawng hian thil a kal palh anga, he dan hi kaihthawh a ngai ang tih pawh a hlauhawm hlel lo e.