Zawhna: Ka pu kum 72 mi hi zunthlum nei a ni a, a chet sual vangin a kawng a tina a, eng emaw chen chu a khum bet titih tawh a, zunram thiar vel pawh a harsat avangin a khum bulah kan inthiartir mai thin. Tun hnai khan a chawn tha hi na a ti tlat mai a, khawih zawngte hian a \ek na angte hi a feel zauh zauh bawk. A ke chet chu a tibuai hran lo thung. Engtia han enkawl chi nge ni ang? Eng nge a chhan ni thei ang? Min puih theih chuan ka lawm ngawt ang. Chhanna: Kum upa lam, tar chak tawh lote hi intihpalh lakah venhim an ngai khawp mai a. A tlangpuiin khumbet nasate an nih loh phei chuan an khawhar chhawk nan hian han len khawthawnte hi an chak zual emaw tih tur ania. Khawlaia anmahni a han mal lentir ngawk ngawk pawh hi an ngaihtuahawm duh viau mai. In lamah lah mi kan lo buai tawh vangin han awmchilh chawta vengtu tur an nei lo fo a, mahni inchhunga step kal fo ngai te, inthiarna remchang lo te, in bul hnaia step kal ngai chi angah te phei chuan fimkhur zual a ngai hle mai. An reflex a chak tawk tawh loh avangin an tluk palh pawha an taksa inveng thei tur khawpin an fit tawh lo va, an tluk sual hian kawng, khel ruh leh dar leh nak bawr te hi an tina palh duh khawp mai. Ruh tliak an neih lahin a ti sawngnawi zual duh leh nghal a, a chenpuitute’n kan fimkhurpui an ngai khawp mai. Zunthlum a nei i ti a, enkawlna damdawi eng emaw tak in pe turah ngai ta ila. A lung lamah fel lohna a neih leh neih loh i sawi hran lo va, check theih nise a tha hle mai. A bikin ECG te tal lo tihsak thei ta ula. Khum bet titih an nih phei chuan annual check-up mai ni lovin kum khatah vawi 2-3 te pawh blood test te ti thei ula a tha khawp ang. Chuan, khum bet deuh reuh a nih chuan a taksa a che tlem viauin a rinawm a. Fimkhur ngai ta chu a Vein lam fel lo, Deep Vein Thrombosis (DVT) an neih loh nana hmalakpui hi a ni. DVT hi vein chhung bang chhah emaw tih palh emaw thisen luang muang vanga thi khar insiamin vein a hnawh vanga awm thin a ni a. Zaipui tawk te, Cancer treatment la laiah te, meizu nasaah te, taksa rit lutuk te, bed rest rei lutukah te pawh a awm thei thin. Thlawhnaa zin nasaah te a awm duh viau bawk. Nu naupai laiah te, nau neih hnu atanga kar 4-6 ah te, naupai venna oral pills ei laiah te a awm duh bawk. DVT hi lang chhuak mai lovin a awm thei a, a hlauhawm nachhan ber pakhat chu thisen zama thisen khar (thrombus) bet a kha a bung emaw darh palh chuan vein-ah kal chhoin lung emaw chuapah emaw a lut palh a, chu chuan thihna hial a thlen thei a ni. A ke nat dan i han sawi khan a rinhlelhawm thei viau mai a, a thenah chuan ke a tivung thei bawk. Pawimawh ta chu DVT a lo ni palh a nih chuan enkawl thuai a ngai a, confirm turin Ultrasound tih a ngai a ni. A rem theih dan hram a awm chuan Ultrasound hi lo ti ngei thei ula, DVT a lo nih loh hlauh chuan a ngaihthat thlak phawt ang a, a chhan dang zawn leh a ngai dawn a ni. A enkawlna atan chuan thisen ti pantu (Blood Thinners) an pe thin a, chung zinga kan hriat lar tak tur chu Aspirin hi a ni. Aspirin hi Heart Attack leh Lung lam tha lo neite hian an ei fo a, ei tawh chuan ei deuh reng a ngai thung. Aspirin ei rei hian thi chhuak khawpa intihpalh angah thisen chhuak a tawp lawk thei lo thin a, bakah intauh palhah te an duk hma bawk. Zai ngai (surgery) an nih chuan enkawlna pek hmasak te an ngai thin. DVT a lo ni lo palh hlauh a nih chuan tha chat (muscle cramps) vangte pawhin a awm thei bawk a. Ke chet tlemah te, upa lamah phei chuan calcium tlakchham mai mai te a awm duh vangin hei hi hriat tel a tha hle. Physiotherapy an mamawh thin a, DVT laka inven nan hian chutiang enkawlna chu pek tel theih a tha hle. Khumbet rei chi-ah reng reng chuan physiotherapy hi tih thin a tha hle a, tihrawl an massage tel a, chu chuan thisen che vel a pui a, harsatna awm thei hrang hrang lakah a veng bawk thin. Engpawh nise, surgeon lo entir thei ula chu duhthusam a ni e.