Zawhna: Mipa kum 42 mi ka ni a, ka k^wng a na thin a, MRI ka tihin spinal cord a disc tawlh chhuak thin niin a lang. Chu chuan ka nerve a khawih buai a, nitin na chhawkna mum hnih tal ei a ngai a, ei loh chuan na a chhuak a, engmah ka ti thei ngai lo. Na chhawkna ei reng hi a ninawm ka ti a, ei lohin a na bawk si a, khawngaihin min pui thei em? - Roliana

Chhanna: I rawn sawi ang hi “Slipped Disc” tia kan sawi hi anih hmel a, hnungzang ruh inkara shock absorber ni tura awm an ni a, hnungzang ruh chhung kuaah hian thluak atanga rawn chhukthla thazam hlawm “spinal cord” hi a awm a, heng disc te hi eng emaw vangin an thler palh emaw sawng vang tein a them a rawn put chhuak a, chu chuan spinal cord hi a nek a, thazam a nek tak vangin na an tuar thin a ni. A nasa leh rei tawh ah phei chuan ke zeng ang te pawh a thleng thei a ni.

Rit chawi nasat vang te, intih palh vang tein a awm thei a, upat hnu hian ruh a lo khawng tak vangin a awm fo bawk. Thau lutuk (obesity) hian hnungzang ruh hi a tuartu a ni fo a, slipped disc pawh an nei hma bik a ni. Khum dik lo te, office chair hnungzang kual mil lova thut nasat te, tin, kum 30 pelh tawh hnua inkhel tha leh, a bikin taksa chet nasat ngai sports (eg.badminton) tih nasat te hian a awm duh hle bawk a ni.

MRI hi a confirm na tha ber chu a ni a, chumi atanga an en che a, hetiang harsatna hi i nei nia an sawi chuan enkawl i ngai ngei chu a ni. Hetiang harsatna tam zawk hi chu damdawi leh physiotherapy hmangin an enkawl thin a, physiotherapy hi Civil Hospital, New Life Hospital leh Trinity Diagnostic Center ah te an ti thei a, pan ve chhin la a tha viau mai. Exercise te pawh hetiang harsatna nei tan hian a bika duan a awm nual bawk a, internet lamah a tih dan tam tak a en theih bawk.

Damdawi leh physiotherapy hmanga a dam theih loh chuan zai a ngai ani thei ang. Zai hi doctor te'n a nazawngin an chawh hran lova. Amaherawhchu minimal invasive surgery an tih mai ang chi te a awm tawh a, orthopedic surgeon lo râwn leh la, i harsatna hi chu an puih theih ngei che ka beisei. Na chhawkna te pawh hetiang atana ei chi bik te a awm tawh a, na chhawkna pangngai i ei reng chuan i pum chuan a tuar ngei dawn a, chuvangin a rang lamin mi thiamte lo râwn ngei ang che.