Dr Ka Zawhna

Doctor Ka Zawhna (July 06, 2014)

Dr. Chawnglungmuana - Jul 05, 2014

Doctor Ka Zawhna (July 06, 2014)

Zawhna: Ka pu, ka fapa hi kum 10 chuang teh meuh mai ruihhlo vangin a buai tawh a. A enkawlna chi hrang hrang kan ti tawh a, Home leh Center-ah te pawh kan awm tir fo tawh thin. Mahse hma a sawn hlei thei lova, a tha emaw kan tih lai hian a lo tlu leh thin a, ka beidawng takzet tawh a ni. Engtinnge kan enkawl tak ang? Min puih theih chuan ka lawm ngawt ang. Chhanna: Ruihhlo avanga buaina hi a tuar ve lo tan chuan hriatthiam a har khawp ang. A manganthlak zia te, a beidawn thlak zia te leh, a chang phei chuan a thinrim thlak a, fate meuh pawh tuithlar mai chak chang a awm fo thin ani tih te hi a tuar ve lo chuan an hrethiam kher lovang. I harsatna hi ka hriatthiam pui hle mai che. Mahse kum 10 chuang zet i buaipui tawh hnu pawha puih theih dan kawng a awm nge awm lo i la ngaihven avang hian lawmthu ka han hrilh hmasa teh ang che. I fapa i hmangaihna hi a chhuanawm a, entawn tlak i ni ka han ti hmasa a ni. Ruihhlo ngaih (Drug Addiction) hi mithiam te chuan Psychiatric Disease (Rilru lam natna) chi khatah an ngai hial reng a. Natna benvawn, lan chhuah chang nei fo thin (chronically relapsing disease) ti te pawhin an sawi thin a ni. Ruihhlo an khawih hian an taksa a khawih danglam tawh a, zunthlum natna veiin Insulin Hormone a mamawh ang mai hian an damdawi hman sual hi an taksa ti normal tura an mamawh a ni tawh thin a ni. Heti zawnga ka sawi rual hian "Natna" ti anga inngaih vanga sim tum lo te a awm theih a. A enkawl theih a, sim hlen pawh thahnem tak an awm ve ani tih erawh kan hriat a tha hle. I rawn sawi hmang atang hian Opioids damdawi engemaw ber, Proxyvon (Parvon tih pawhin a awm) emaw Heroin (No.4) anih duh hmel viau a. Tin, a inchiu zawngin a hmangsual turah ka han ngai phawt a. Damdawi ruih nana an hman hi chi hrang hrang a awm a, a then chu ei chi te, in chi te, hnim chi te leh, zuk/hip chi te pawh a awm bawk. Opioids erawh hi chu ei emaw hip (chase an ti) chu awm ve bawk mahse a tam zawk chu inchiu an ni tlangpui. A enkawl danah chuan chi hrang hrang a awm thei anga. I rawn sawi tak te pawh hi Rehab treatment an tih te pawh a ni a, a then chuan Detox treatment te pawh an mamawh fo bawk. A enkawl kawngah hian an khawvel awm dan thlak danglam hi a pawimawh khawp mai a. An nitin hun hman dan zawi muanga thlak sak te, an tui zawng tur ngaihtuah pui te, an hun awl hnawh khah dan ngaihtuah pui te a tul fo bawk. Hetiang ah hian Counselor tha an mamawh hle a, Counseling kan sawi pawh hian kan rilru ah chuan Spiritual Counseling hi a tla na viau zel a, mahse Psychotherapy zawnga enkawl thei Counselor an mamawh hle a ni. Kum 2007 atang khan Opioids addict te tana hman tur enkawlna hi sawrkar hmalakna in kalpui a ni a, chu chu Opioid Substitution Treatment (OST) an ti a. An damdawi hman thin hi a dose hriat chian loh, a market azira chak emaw chak lo thei a ni a, a hlauhawm a, Overdose pawh a thlen fo nachhan chu an dose ngai nia an hriat hi a nih reng loh vang a ni. He OST damdawi Buprenorphine erawh hi chu a dose dik tak hmanga enkawla control theihna a ni a, mi tam takin an thatpui mek a ni. Aizawl bikah chuan NGO pali - AGAPE, Durtlang, Grace-Inn, Sikulpuikawn, Samaritan Society, Chanmari leh, SHALOM, Lower Zarkawt ah te he enkawlna hi hman mek a n a, Aizawl Civil Hospital ah tih tan ani bawk a. Heng hmun te hi lo pan thei la, an puih theih ngei che ka ring. Chu bakah chuan Psychiatrist thiam tak tak kan nei a, an ni te pawh hi pan theih reng an ni bawk a, i lo la pan lo anih chuan han enchhin ve reng reng ta bawk la, i beisei aia tha zawk mah enkawlna te pawh an lo pek theih ngei che ka ring.
Share now