Zawhna: Kum 43 ka ni a englai mai hian ka kua hi a puar reng mai a, ka pum hi endoscope hmangin ka entir fo a, engmah that lohna an hmu lo a, hei hi engvang nge ni thei ang? Tihdam theih ani em? Chhanna: Pum lam insawiselna hi a chhan tam takah chuan pumpui leh chaw kawng lawng emaw, pan (gastritis or ulcer) emaw vang a ni chung hian harsatna dang vangin a awm fo bawk. A bik takin zunthlum nei te, thin lam tha lo te, stress nei nasaah te a awm duh hle. Kan ei leh in digest tura pumpui inbuatsaih hian kalphung mumal tak a nei a, hunbi mumal lo taka chaw ei te hian chu kalphung chu a tibuai duh hle. Tin, kan thil ei quality hi a pawimawh khawp mai bawk a, diet lam mi thiamte sawi fo angin balanced diet kan ei thiam hi a pawimawh hle a ni. Thil mawm lam ei nasat lutukte hian digestion a tibuai fo a; tin, vitamin tlakchhamte pawh a thlen fo thei bawk a ni. Endoscope lamah fel lo an hmuh loh avangin digestion lam harsatna eng emaw tak i nei a ni thei a. Irritable Bowel Syndrome (IBS) hi nei an awm fo a ni. Chutiangah chuan pum nuam lo el ul, na ni chiah si lo, awm tinuam lo ang te hian an awm duh viau a. A then chu ek mumal lote pawh an nei tel fo bawk. Tin, typhoid natna hian ril a khawih tel thin avangin pum lam insawiselna nei hi an awm fo a, santen benvawn nei te pawh an awm zauh zauh bawk. I thin (liver) lam fel lohna i nei nge nei lo hriat pawh a tha viau mai; liver function test te lo ti thei la, chubakah chuan ek exam te pawh nei ve ta la. A dang lehah chuan mit-a lung awm (gallbladder stone) hian pum nuam lo a thlen fo bawk a, ultrasound lo ti tel thei la, a chhan awm thei angte zawn chhuah tum kha tih hmasak a ngai a ni. Tihdam theih a nih leh nih loh chu sawi mai a harsa a, a chhan a zir te pawh a ni ang.