Zawhna: Ka chaw ei a tui lo a, mahse ka ril a tam em em bawk si a, engmah hi ka ei tui thei chuang lo a, eng nge a chhan le? Ka luak a chhuak a, ka lu te a na lutuk a, enge a chhan khawgaih takin min lo hrilh. 

Chhanna :  Kan rawn tarlan tawh thin angin zawhna zawttu te hian in kum zat, mipa nge hmeichhia, nupui pasal neih leh neih loh, leh khawsak phung (hnathawh nei em? Lirthei ah chuang nasa em?) te nen lam hian rawn ti lang tel thei ula chuan in harsatna puih kawngah hian hma kan sawn thei deuh ngei ang. A chhan pawh natna tam zawk hi nih phung leh nun phungah a innghah vang a ni (upat/naupang lama vei chi te, mipa leh hmeichhe vei chi te). 

    Doctor hnena inentir dawn pawh hian kan nat dan chiang taka sawi thei tura rilru lama kan lo inbuatsaih lawk hian doctor te a pui hle a ni. Chaw ei tui lo hi enge a chhan ni ang ti ta ila chhanna tam tak a awm thei anga, chutih rualin i ril a tam em em chung pawha i chaw ei a tui chuang si lo anih chuan a chhan ni thei awm tak chu ei leh in mumal lo, hunbi nei mumal lova ei leh in vang a ni duh viau (disordered eating habits). A dang leh ah chuan tleirawl zingah nalh loh hlauh vanga chaw ei ngam lo, riltam tawpkhawka ei chiam, a hnu lawka inkawm luak leh si ang te a awm thei bawk. 

    Thau lam nge i nih cher lam tih i sawi lang lova, thau lutuk ah a awm thei bawk a, psychological disorder (rilru lam fel lohna) ani duh viau bawk. Zu in nasa leh thin lam fel lo (alcoholic liver disease) te hian an nei duh viau bawk. Pumpui lam fel lo a awm tel ngeiin a rinawm a, luak chhuak i rawn sawi lan vang te pawh a ni thei bawk. A dang leh ah chuan hritlang benvawn nei, sinus problem nei te hi an rim hriatna a tih buai avangin chaw chakna an nei lo fo thin bawk a. Kuhva ei nasa te hi an tui hriatna (taste buds) a buai tel fo avangin hetiang insawiselna hi an nei duh viau bawk. 

    Lu na i sawi hi a inkaihhnawih loh a rinawm viau a, chutih rualin BP lam fel lo i nei nge nei lo hriat a tha hle. I insawiselna hi a chhan engemaw tak hriat emaw rin theih tur a awm loh chuan damdawi lam han inchawh ngawt a fel lo thei a. Chuvangi a chhan hre turin endoscopy te, blood sugar test leh liver function test, BP check te lo ti thei ta la, a tul dan azirin Medicine Specialist lo rawn chhunzawm la, i harsatna ah hian puih theih i nih ngei ka beisei. 

    Hemi bakah hian i ei leh in lam lo uluk la, hunbi mumal deuhva ei te tum la, i thil ei pawh a quality lam ngai pawimawhin balanced diet lam i ei theih nan dietician te lo rawn tel bawk la, i hlawkpui ka ring bawk.